PARC-petisie is goedgekeur
OUDTSHOORN - Die Nasionale Raad van Provinsies het onlangs 'n petisie deur die drukgroep PARC (People against Race Classification) goedgekeur.
PARC, onder leierskap van Glen Snyman, eis reeds vir die afgelope 12 jaar dat die term "coloured/kleurling" uit alle Suid-Afrikaanse, regerings en privaat maatskappydokumentasie geskrap moet word en dat rasgroepe onder 'n enkele term "Afrikaan" geklassifiseerd moet word om diskriminasie op grond van pigmentasie, hok te slaan.
Die leuse van PARC is "I am not a coloured, black, Indian or white person, I am a South African."
Benewens die feit dat die Nasionale Raad die Menseregtekommissie ses maande gee om navorsing te doen oor die kwessies en terugvoering te gee aan die raad, is daar ook bevind dat 'n nasionale debat in parlement gevoer moet word om erkenning te gee aan die identiteite van inheemse gemeenskappe.
Die woord coloured of kleurling is volgens Snyman deur die destydse apartheidsregering afgedwing en die gebruik van die woord, verdoesel ook inheemse bevolkingsgroepe soos die Khoi en San.
Snyman beskou die nuutste nasionale verwikkelinge ten opsigte van PARC se missie, as 'n oorwinning, en sê dat hy dankbaar is dat die stryd halfpad gewonne is.
Snyman het ook sogenaamde "wit mense" aangemoedig om hul ware identiteit as "Afrikane" te omhels omdat daar nie meer na die rasgroep soos vroeër jare as "Europeërs" verwys word nie. "Op hierdie manier word daar eienaarskap geneem van hul Afrika-herkoms," het Snyman verduidelik.
Die geskiedenis van rasseklassifisering kan nageslaan word by www.camissamuseum. co.za of alternatiewelik by PARC se webtuiste www.parcsa.co.za.