2002-matrieks van Bridgton Sekondêr hou reünie
OUDTSHOORN - Die 2002-matrieks van Bridgton Sekondêr (BSS) het verlede Saterdag hul 20 jaar-reünie in Oudtshoorn gevier. Die reünie het met ’n ontbyt by Route 62 Restaurant begin. Daarna is daar heerlik by T-Bow Lounge gekuier gevolg deur 'n spitbraai by die skool.
Verskeie onderwysers het ook deelgeneem aan die ontbyt waar ondermeer skoolgrappies vertel is en ook selfies geneem is. Tydens die toesprake het die oudleerders erkenning gegee aan die positiewe impak wat die skool op hulle lewens gehad het en dat hulle altyd trotse Zibi’s sal bly.
Die destydse skoolhoof, Albie Ellman, was die gasspreker en het trots gesê dat dit 'n groot voorreg vir hom was om duisende kinders as sy eie te kon beskou en met behulp van 'n pligsgetroue en talentvolle skoolpersoneel, hulle ‘n regverdige kans in die lewe kon gegee het.
Met sy aftrede wat vanjaar 30 September begin het, het oudonderwyser Jerome Jantjies op sy beurt gedeel van sy passie vir kinders en onderrig en hoe dit tans vereis word van die moderne onderwyser om aan te pas soos die tye verander.
Dié leerlinge van 2002 is deel van 'n baie spesiale groep wat eerste onafhanklik van BSS geword het en die destydse Bridgton Junior Sekondêr (nou Aurial Kollege) geopen het.
Hulle het daarom ook erkenning gegee aan Phillip Stalmeester wat toe die skoolhoof was. As deel van 'n klein gebaar van waardering het die oudleerders ook geskenkies oorhandig aan die onderwysers teenwoordig.
'n Kers is ook aangesteek ter nagedagtenis aan medeleerders en onderwysers wat oor die jare heengegaan het. Die 2002-matrieks sien nou entoesiasties uit na die volgende reünie.