‘Quilts in a Church’
Nieu-Bethesda is bekend as ‘n dorpie vir kuns en kunssinnigheid en van 13 tot 16 Desember kon die publiek na die Quilts in a Church-uitstalling, wat in die meer as 140 jaar oue NG Kerk uitgestal is, gaan kyk het.
Antoinette Kriel het die idee gehad om dié talent en vaardigheid van kwilt- en tekstielkuns hier uit te stal en dit was vanjaar die derde keer wat die uitstalling gehou is.
“Die droom om hier uit te stal het in 2017 begin toe ek in die kerkgebou ingestap het. Die kerkraad het toestemming gegee en die eerste uitstalling het in Desember 2019 in die pragtige kerkgebou plaasgevind,” sê Kriel.
Kriel is ‘n lid van die Dias-kwiltersgilde in die Gqeberha-omgewing asook ‘n lid van die Outeniqua-kwiltersgilde in die Georgeomgewing.
Die sowat 80 kwilte wat uitgestal is, is deur lede van die twee gildes gemaak.
Die kleur- en storierryke bedkwilte is op die banke en teen die galerye uitgestal met ‘n paar muurkwilte vir die beperkte muurruimte.
Om die ruimte in die kerk optimaal te benut, word daar ook elke keer van satellietuitstallings gebruik gemaak. Hierdie jaar is die twaalfde Suid-Afrikaanse Kwiltersgilde se reisende uitstalling, A Stitch in Time, asook tekstielkuns met die tema, Stories deur Tape (Textile Artists PE) uitgestal. Fab (Fibre Artists of the Bay) het hulle installasie met die tema, Reimagine, uitgestal.
Hierdie uitstalling is voorwaar ‘n hoogtepunt in Nieu-Bethesda en elke naaldwerker en tekstielliefhebber behoort die geleentheid by te woon. “Die kwilte is elkeen ‘n inspirasie,” sê Kriel.