Hidroloog boor vir water
Chriszanne Janse van Vuuren
Ten einde aandag te gee aan die geweldige waterkrisis in Willowmore het ‘n hidroloog, Dirk Rudolph van
GHT Consulting, onlangs met die prospektering vir addisionele waterbronne in die Willowmore-omgewing begin. Die prospektering word deur die departement van waterwese gefinansier en volg nadat ‘n hidrologiese verslag verlede jaar uitgewys het dat die hoeveelheid water tans beskikbaar op die plaas Wanhoop* heeltemal te min is. ('n berig, Waterkrisis in Willowmore, het op 8 Februarie in GraaffReinet Advertiser verskyn.)
Die munisipaliteit het ‘n lisensie om 1 425 kiloliter water per dag vanaf Wanhoop te pomp. Tans is daar egter net ongeveer
925 kiloliter water per dag beskikbaar. Boonop veroorsaak faktore soos beurtkrag, stukkende pompe en lekkasies op die pyplyn dat daar soms nog minder water na Willowmore gepomp word. Willowmore benodig ongeveer 1 250 kiloliter water per dag.
Vyf boorgate van tot 300 m diep gaan deur GHT in hierdie omgewing geboor word. Die eerste daarvan is reeds voltooi, en op Maandag 20 Februarie is daar met die tweede boorgat begin.
Terwyl daar na addisionele waterbronne gesoek word, duur die waterkrisis in Willowmore voort. Benewens die lekkasies op die pyplyn word lekkasies in die dorpsgebied, soos een in Markstraat wat al van Desember verlede jaar voortduur, nie herstel nie. Volgens raadslid Ewald Loock het die tekort aan water nou ook in ‘n sanitasieprobleem ontaard, en hy wil met die plaaslike skoolhoofde vergader omdat hulle die departement van omgewingsake gaan nader om die situasie by die koshuise te evalueer.
“Om ‘n koshuis vol kinders te huisves met die waterkrisis, skep geweldige sanitasieprobleme.”
Volgens Loock is daar steeds geen superintendent vir water in Willowmore aangestel nie.
Hy noem dat die munisipaliteit op Maandag 19 Februarie ‘n kortlys saamgestel het vir die aanstelling van vier addisionele werkers in Willowmore, maar dat slegs twee vir waterwese is.
Tot dusver het DBNPM nog nie op Graaff-Reinet Advertiser se vrae rakende die watersituasie in Willowmore gereageer nie.
*Willowmore se water word al vir dekades vanaf die plaas Wanhoop in die Uniondaledistrik na die dorp gepomp.