DIENSLEWERING Willowmore se werkloses maak geraas
Chriszanne Janse van Vuuren
Werklose inwoners het op Maandag 11 Maart die Dr Beyers Naudé-munisipaliteit se kantoor, die verkeersdepartement, toerismekantoor en biblioteek in Willowmore laat ontruim en toegemaak. Willowmore se brandweerdienste is ook tot stilstand gebring, met die opdrag dat hulle net mag beweeg indien daar ‘n ernstige brand is wat bestry moet word. Dit het gevolg nadat hierdie inwoners vroeër die dag by die munisipaliteit bymekaargekom het om antwoorde te eis oor die verlenging van 25 werkers wat vroeg verlede jaar aangestel is se kontrakte, maar daar was glo niemand om met hulle in gesprek te tree nie.
Die munisipaliteit se voormalige direkteur van gemeenskapsdienste, Gewnynne Hermanus, het voorheen bevestig dat 313 kontrakwerkers verlede jaar deur die munisipaliteit se direktoraat van gemeenskapsdienste in samewerking met die departement van bosbou, visserye en die omgewing aangestel is. Die kontrakte vir hierdie aanstellings is toegeken aan inwoners van verskillende dorpe binne die munisipaliteit.
Die kontraktydperk was aanvanklik veronderstel om net vir ses maande te wees, maar sedertdien is dit al twee keer verleng met ‘n addisionele ses maande.
Volgens Graim Wolhuter, verteenwoordiger van die EFF in Willowmore, spruit die werklose inwoners se ontevredenheid uit die feit dat dit elke keer dieselfde 25 werkers is wat aangestel word wanneer die kontraktydperk verleng word. “Die departement het hierdie mense glo aangevat vir ses maande en daarna is die tydperk verleng met nog ses maande. Twee weke gelede het hulle kontrakte verval, maar verlede Donderdag het hulle weer geteken vir nóg ses maande dieselfde mense. So ons wil net weet wanneer ander mense ‘n geleentheid gaan kry om te werk vir ses maande of ‘n jaar,” verduidelik Wolhuter.
Met die eerste verlenging van hierdie werkers se kontraktydperk was die werklose inwoners van Willowmore en Rietbron al erg ontevrede.
Op daardie stadium het Hermanus verduidelik dat die ooreenkoms tussen die munisipaliteit en die departement nie voorsiening maak vir nuwe kontrakte nie, maar slegs vir die verlenging van bestaande kontrakte.
Die enigste twee opsies was dus om die kontrakte van die huidige werkers te verleng óf om dit te kanselleer. Daar was geen opsie vir die aanstelling van nuwe werkers nie.
Die munisipaliteit se areabestuurder, Zenobia Hendricks, het dit ook so aan die werklose Willowmore-inwoners verduidelik toe hulle op Dinsdag 12 Maart weer by die munisipaliteit vergader het om antwoorde te eis.
Hendricks was egter nie beskikbaar om vrae te beantwoord oor die beweerde onreëlmatighede tydens die aanstelling van hierdie werkers nie. “Ons verstaan dat dit nie die munisipaliteit is wat hierdie mense betaal het nie. Ons verstaan ook dat dit nie die munisipaliteit is wat besluit het dat hierdie mense se kontrakte hernu moet word nie. Wat ons bevraagteken is die manier hoe hierdie 25 persone geïdentifiseer is,” sê Wolhuter.
Volgens Wolhuter is daar tydens die laaste bymekaarkoms op Dinsdag besluit dat die 25 kontrakwerkers se werksaamhede onmiddellik gestaak sal word en dat die departement van bosbou, visserye, en die omgewing ingeroep sal word om die situasie te beredder.