Spandau doen dit weer!
Spandau Sekondêr se rugbyspan het vir 'n derde agtereenvolgende jaar koning gekraai by die jaarlikse FNB Classic Clashes Festival Oos-Kaapse toernooi, met 'n telling van 26 - 10.
Die toernooi het vanaf 29 Maart tot 1 April by die Nelson Mandela Universiteit Stadion in Gqeberha plaasgevind. Altesaam 12 skole van die provinsie, Hoërskool Alexandria,
Ukhanyo Sekondêr, Hoërskool Kwazakhele, Mzontsundu Sekondêr, Hoërskool Ndzondelel, Ithembelihle Comprehensive, Hoër Mary Waters, Spandau Sekondêr, Booysen Park Sekondêr, Asherville Sekondêr, Molly Blackburn Senior Sekondêr en Hoërskool Uitenhage, het hieraan deelgeneem.
Afrigter van Spandau Sekondêr se rugbyspan, Cornell George, sê dat sy spelers baie hard geoefen het vir hierdie byeenkoms en dat hulle bevoorreg is om drie jaar agter mekaar die trofee huis toe te kan bring.
“Ons voorbereiding vir die jaar was 'n bietjie uitdagend, maar ons het probeer om seker te maak dat ons spelers voorbereid is vir die toernooi ons is gelukkig deur Union High en Hoërskool Kirkwood vir ‘n wedstryd ter voorbereiding, genooi.” George sê dat harde werk, motivering en die voorreg om die sport te kan beoefen én geniet, die resep tot die spelers se sukses is. Tydens die toernooi het Spandau en Asherville Sekondêr na die halfeindronde deurgedring en uiteindelik het Spandau na die eindronde deurgedring en teen Hoër Mary Waters te staan gekom. Volgens George is
die eerste span se kaptein, Sheldon Jaftah, 'n uitmuntende leier en speler en Jaftah is geweldig trots op sy medespelers. Jaftah is ook as rugbyspeler van die toernooi aangewys.
Spandau se eerste netbalspan het 'n tweede plek in die toernooi behaal. Hulle het te staan gekom teen Mzontsundu Senior Sekondêr en 27 - 14 in die eindstryd behaal.
Waylon Adams, onder kaptein van Asherville Sekondêr, is ook in die FNB Clashes Festival 2024 Elite span opgeneem. Asherville se rugbyspan het ‘n algehele vierde plek in die toernooi verower. Twee van Asherville Sekondêr se netbalspelers het ook met toekennings weggeloop: Dudley-Ann McCarthy is as netbalspeler van die toernooi en Nicole Mafikeng as verdediger van die toernooi, aangewys.
“Die toernooi se doelwit is om talentvolle studente van skole wat finansieel swaarkry, se talente te ontwikkel,” sê Unathi Billie, hoof van FNB Besigheid Oos-Kaap Verkope. In samewerking met die
Nelson Mandela Universiteit en Oos-Kaap-rugby, beoog die inisiatief om opkomende talent ten toon te stel en geleenthede te bied vir studente om sowel sport as akademiese doelwitte na te streef.
Verder as net sport, word daar ook klem gelê op akademie, met deelnemende universiteite wat op soek is na potensiële vooruitsigte. Dit bied studente geleenthede vir beurse, wat van groot belang is vir dié wat uit finansieel beperkte agtergronde kom, en stel hulle in staat om 'n balans te vind tussen akademiese en sportiewe strewe.
Sonia Wahl