Erfenis vir ewig verlore
Teresa Opperman
Inwoners van Hofmeyr het onlangs gehoor dat die eerste kettingwinkel eersdaags in die klein gemeenskappie opgerig gaan word. Hierdie is die eerste kettingwinkel van sy soort in die dorp se 150 jaar van bestaan.
Groot opgewondenheid het onder inwoners geheers omdat daar gehoop was dat een van die beskadigde geboue op die hoofroete deur die dorp gesloop sou word om plek te maak vir die winkel, maar die ontwikkelaars het egter ander planne gehad en gesê dat een van die leë erwe benut sal word.
In die begin van April het dit vir inwoners duidelik geword dat die winkel nie op 'n leë erf opgerig gaan word nie, maar dat die ongeveer 150 jaar oue hartbeeshuisie in Voortrekkerstraat plek gaan maak vir die kettingwinkelgebou. Blitsvinnig, binne twee dae, is die hartbeeshuisie met sy ringmuur tot net 'n kaal erf met rooi grond geminimaliseer.
Verskeie oudinwoners het hulle herinneringe van die huisie gedeel en talle foto's is opgediep en op sosiale media gedeel. Wyle ds.
Kobus Victor het reeds jare gelede sy ervaringe as seuntjie in die huis gedeel. 'n Stamvader uit Hofmeyr, Petrus J Hattingh van Gannaleegte, het in die middel sestigerjare die huisie gekoop en dit as historiese gedenkwaardigheid geregistreer.
Inwoners is baie hartseer oor die afbreek van die huisie, omdat daar reg langsaan 'n verwaarloosde gebou staan wat vroeër jare as munisipale kantoor gedien het, wat moontlik gesloop kon word vir die oprig van die kettingwinkel.
"Dit is nou water onder die brug en daar is nou wraggies geen salf aan te smeer nie," sê 'n inwoner van Hofmeyr. Volgens haar is alle huise in Hofmeyr ouer as 60 jaar en moet jy toestemming by die Raad vir Nasionale Gedenkwaardighede in Grahamstad kry om enige verbreking of verbouing aan so 'n gebou aan te bring, wat nog te sê van afbreek.
Die Advertiser het ook Saterdag 13 April 'n e-pos aan die Raad vir Nasionale Gedenkwaardighede in Grahamstad gerig, maar geen terugvoer ontvang nie. Teen Sondag was die vensters van die gebou ongelukkig reeds uitgeslaan.