Rare gesig: Beervleidam het water!
Chriszanne Janse van Vuuren
Willowmore het die afgelope tyd baie goeie reën ontvang. Op Sondag 7 April is daar 50 mm reën gemeet en Maandagoggend, 8 April, 16 mm wat die totale reënval op 66 mm bring.
“Die riviere was wel nie vol nie, maar al die stroompies het geloop. Dit was alles lekker sagte reën en die grond was deurnat. Uit ‘n landbou-oogpunt is dit fantasties want as jy hierdie tyd van die jaar reën kry bly dit sommer lekker lank nat omdat die dae nie meer so warm is nie. Alle grondgebruikers is tevrede,” sê Ewald Loock, raadslid en inwoner van Willowmore.
“Geen verspoelings is aangemeld nie, maar die laagwaterbrûe is nog toe, so voertuie kan nog nie deurgaan nie.”
Loock vertel dat die Traka-gebied aan die westekant van Willowmore tussen
70 mm en 100 mm reën gemeet het. “Beide die Trakarivier en die Sandrivier het lekker sterk gevloei.” Hy verduidelik dat hierdie twee riviere vanuit die droogste gebiede aan die westekant van die Karoo vloei en dan by Oudtshoorn se Stompdriftdam inloop. Die Stompdriftdam was op 1 April ongeveer 25,5% vol en intussen het die damvlak aansienlik gestyg omdat dit soveel water vanuit hierdie twee riviere ontvang het.
Vanaf Saterdag 13 April het daar weer 25 mm reën in die Willowmore-omgewing geval.
Selfs die Beervleidam het tans water en dit is nie ‘n algemene verskynsel nie. Volgens die departement van water en sanitasie kwalifiseer die Beervleidam nie as 'n balanseringsdam óf 'n opgaardam nie, maar behoort aan 'n kategorie van sy eie – dit is gebou as 'n vloedbeheerdam om die Gamtoosriviervallei teen oorstromings te beskerm en om sy vloedbeheerfunksie uit te voer word die dam teen 0 % bedryf.
Alhoewel die dam op hierdie stadium baie vol lyk, het dit volgens Loock eintlik baie min water.
“Dit is ‘n mite dat die dam se sluise altyd oop is en dat die water altyd moet deurloop. Daar is honderde hektaar besproeiingsgrond ingelys onder die Beervleidam so dit is nie net ‘n vloedwaterdam nie, maar ook ‘n besproeiingsdam. Wanneer die dam water kry word die eerste water gewoonlik deurgelaat omdat dit van die Soutrivier afkomstig is en baie soute in het. Wanneer die soute uitgespoel het word die sluise toegemaak en dan kan dit vol raak en selfs oorloop soos in 2002. In tye van baie reën of vloede word die sluise wel oopgemaak om die vlakke van die dam laag te hou,” verduidelik Loock.
“Daar het wel ongeveer 50 mm tot 60 mm reën in die omgewing van die Beervleidam geval, maar reën in die omliggende gebied sal nie die Beervleidam volmaak nie omdat sy water hoofsaaklik van die Soutrivier wat uit Nelspoort uit vloei kry. Vir die Beervleidam om water te kry moet dit dus in die opvanggebied ook hard reën.”
Loock noem dat hy ook verneem het dat die fontein op Wanhoop waarvandaan ‘n gedeelte van Willowmore se water afkomstig is, sterk vloei na die lekker reën.
“Die produksie van water op Wanhoop en gevolglik ook die watersituasie in Willowmore het sommer onmiddellik verbeter,” sê hy. “Dit is fantastiese nuus vir beide die munisipaliteit en Willowmore se inwoners.
“Ons is uiters dankbaar is vir die lieflike reën wat geval het.”