Twee vir dorp van die jaar
Chriszanne J van Vuuren
Beide Aberdeen en Jansenville is hierdie jaar genomineer as semifinaliste in Kwêla se gewilde Dorp van die Jaar-kompetisie. Hierdie twee Karoo-dorpies kom vanjaar teen die Sonskynkus se Kentonon-Sea te staan om as die OosKaapse streeksfinalis aangewys te word.
Aberdeen
"Met die Camdeboo berge in die agtergrond bied díé rustige plattelandse dorpie met sy natuurskoon en helder sterrenagte vir menigte stadsjapies 'n welkome ontvlugtingsoord. Die kerktoring, ook bekend as die leunende toring van Aberdeen, word gereken as een van die hoogste kerktorings in die land terwyl die dorpsgeboue 'n wye verskeidenheid argitektuurstyle uit die verlede trots ten toon stel. Díé sybokhaarmekka is gewild onder stappers en motorfietsryers."
Só is Aberdeen Sondagaand op kykNET se Kwêla voorgestel. Maar inwoners is dit eens dat die regte Aberdeen die mense self is. Mense wat omgee. "Alles gaan oor ‘n dorp se mense," sê Sterna Thwaites, voormalige voorsitter van die Aberdeen Toerisme Assosiasie. "Wat Aberdeen uniek genoeg maak om as Dorp van die Jaar aangewys te word is die volharding van die mense wat passievol lief is vir hierdie dorp. Want dit is so – Aberdeen se mense is líéf vir Aberdeen. Hulle sê as jy eers Aberdeen se water gedrink het dan is dit tickets met jou." Volgens Thwaites word die ondersteuning vir die Dorp van die
Jaar gedryf deur oud-Aberdeners van heinde en verre, mense wat hier grootgeword het, maar 'n lewe in groter plekke moes gaan bou om te oorleef. Mense wat 'n groot verlies gevoel het toe hulle moes wegtrek en steeds terugverlang. "Hierdie mense se onderskraging en steun aan diegene wat graag die dorp wil verbeter gee die aansporing en ek dink nie dit is in ander plekke so nie," sê Thwaites. "Daar is 'n diep, diep liefde van soveel mense vir hierdie dorp." Die manier waarop hierdie gemeenskap hande gevat het om Aberdeen vir die Dorp van die Jaar-kompetisie te bemark is 'n duidelike bewys van hierdie liefde.
Jansenville
"Díé Karoodorp op die walle van die Sondagsrivier is in die hart van die Noorsveld, met sy kenmerkende stekelrige plantegroei, geleë." Leoné Mulder van Jansenville & Beyond-toerisme spog dat Jansenville ook die tuiste van die Euphorbia jansenvillensis is. Hierdie unieke vetplant is in 1932 deur A. J. van Zyl le Roux aan die buitewyke van Jansenville gevind en na die dorp vernoem. "Bekend as die tuiste van Angora-bokke, spog die dorp met ‘n sybokhaar museum en winkel.
Op Jansenville kan jy uitsien na vars Karoolug, gasvryheid, en heerlike Karoo kookkuns by 'n verskeidenheid restaurante en padstalle. Dit is dan ook geen wonder dat Jansenville se ouetehuis, Huis Welverdiend, in 2019 aangewys is as die Oos-Kaap se beste tehuis nie!"
Besienswaardighede híér sluit in die Sid Fourie Huis Museum, die Anglo Boereoorlog Fort asook die kerk wat 'n erfenisterrein is. Mulder voeg by dat Jansenville ook elke jaar die Angora Motocross Adventure Classic aanbied wat veldfietswedrendeelnemers van regoor die land aanlok. "Die dorp se gasvryheid maak dit absoluut die moeite werd om by te woon, selfs al neem jy nie aan die wedren deel nie," sê sy.
Stem vir jou gunsteling dorp
Die publiek het tot 12:00 op Vrydag, 26 April die geleentheid om vir hul gunsteling dorp uit die semi-finalis dorpe te stem. SMS net die dorp se naam na 33157. Elke nommer kan 30 keer SMS en elke SMS kos R1,50 – gratis SMS'e tel nie.
Die Oos-Kaapse dorp met die meeste stemme sal as streeksfinalis teen die finalis-dorpe van die ander agt streke meeding om die gesogte Dorp van die Jaar titel.
Die agt ander streke waaruit gekies word is: Gauteng en Noordwes saam, Noord-Kaap, Wes-Kaap, Vrystaat, Limpopo, Mpumalanga, KwaZulu-Natal, en Namibië. Kwêla sal 'n insetsel op elk van die nege dorpe in die nege verskillende streke wat die finale rondte gehaal het, kom verfilm, en wanneer al nege dorpe op Kwêla gewys het, sal die publiek vanaf 19:00 op 14 Julie tot 12:00 op 19 Julie vir die wendorp kan stem. Die wendorp word op 28 Julie 2024 op Kwêla aangekondig.
Die dorp wat as Kwêla se 2024 Dorp van die Jaar aangewys word wen 'n ongelooflike R1 miljoen se bemarkingswaarde van kykNET.
Homebrew Films, die vervaardigers van Kwêla, sal 'n 45-sekonde advertensie oor die dorp maak wat gedurende kykNET se advertensietyd uitgesaai sal word.
Daar sal ook 'n groot opskop in die wendorp gehou word wat deur Kwêla verfilm en later die jaar uitgesaai sal word. Hierdie jaar het Lottoland ook 'n verrassing vir die wendorp – hulle skenk 'n R1 miljoen-kontantprys vir die wendorp om in die dorp terug te ploeg. Hierdie skenking word in Lottoland se eie hoedanigheid gemaak en sal deur hulle ge-oudit word.
Elke finalis-dorp sal dus vooraf gevra word om 'n besigheidsplan vir die aanwending van die potensiële prysgeld in te dien.