Buffel sneuwel op Park se teerpad
Chriszanne Janse van Vuuren
‘n Treffende foto met die opskrif, Buffel sneuwel onder die sterre, is onlangs deur Jan-Hendrik Swiegers, 'n inwoner van Murraysburg geneem. Hy het dit op sosiale media geplaas en dit het groot publieke reaksie ontlok. Spoed het onmiddelik die skuld vir hierdie ongeluk op die R63 gekry en talle ontstoke lede van die publiek wou weet of die persoon wat die buffel doodgery het darem gaan boet.
Volgens hom was hierdie ongeluk ook nie enig in sy soort nie, jare gelede was daar glo ‘n soortgelyke ongeluk.
Volgens Dennis Fortuin, hoof van die Dr Beyers Naudé-munisipaliteit se beskermingsdienste, is dit op hierdie stadium baie moeilik om met sekerheid te sê dat spoed ‘n faktor in die ongeluk was, omdat die omstandighede eers behoorlik ondersoek moet word. Dan moet daar, volgens hom, ook vasgestel word wáár presies die ongeluk gebeur het, omdat “Op nasionale paaie en in die dorpsgebied is daar spoedmaatreëls wat toegepas word maar hierdie maatreëls is nie van toepassing op die park se binnepaaie nie,” verduidelik Fortuin.
Ooggetuies beweer dat spoed wel ‘n faktor in die ongeluk was. Na bewering is die buffel deur ‘n bakkie wat ‘n trok verbygesteek het, gestamp.
Die bestuurder van die trok het glo spoed verminder toe hy die buffel gewaar, maar die bakkie het voortgegaan om die trok verby te steek. Die ongeluk het op die R63 tussen Graaff-Reinet en Murraysburg plaasgevind. Die R63 is ‘n nasionale deurpad in die Camdeboo Nasionale
Park en is dus nie die verantwoordelikheid van die verkeersdepartement of die munisipaliteit nie, maar wel die verantwoordelikheid van Sanral.
Volgens ‘n persoon bekend met die omgewing, is die gejaag op hierdie pad ‘n algemene probleem wat dringend aangespreek moet word. Hy is van mening dat die publiek ‘n versoek by die verkeersdepartement en munisipaliteit moet indien vir die implementering van spoedbeheermaatreëls sodat ongelukke van hierdie aard vermy kan word. “Diere het die reg van toegang binne die grense van ‘n nasionale park maar mense respekteer nie hierdie reg nie en dan kry diere die skuld wanneer daar ongelukke gebeur. Dit is nie die diere se skuld nie, dit is die mense se skuld. As mense by die spoedgrens hou, sal sulke tipe ongelukke nie gebeur nie,” sê hy. Volgens hom is mense gou om te sê dat die buffels nie daar hoort nie, maar daar was nog altyd buffels in die park. “Die buffels hoort hier want hulle was al die jare hier. Daar was aanvanklik 30 buffels, wat baie min is, en vandag is daar heel waarskynlik nog minder.” Volgens hom was hierdie ongeluk ook nie enig in sy soort nie, jare gelede was daar glo ‘n soortgelyke ongeluk toe ‘n trok in die trop buffels vasgejaag het en vyf buffels daarna uitgesit moes word.
Hy beklemtoon dat die park baie belangrik is, en dat dit ook baie belangrik is dat die park oop moet wees omdat dit ‘n groot toerisme aantreklikheid is. Daarom doen hy ‘n beroep op padgebruikers om die spoedgrense én die diere se reg van toegang te respekteer.