VLV oorhandig skenkings aan Vollediens
Talana Verwey, 'n onderwyseres verbonde aan Aberdeen Vollediens Skool, was die gasspreker tydens die Aberdeen VLV-tak se April-vergadering. Verwey sê dat Aberdeen VLV-tak sedert verlede jaar baie betrokke by díe skool is. Verlede jaar het die dames gesorg vir 'n skenking van duvets en ander beddegoed aan die plaaslike koshuis; vanjaar het hulle 'n verskeidenheid eetgerei geskenk.
"Ons skool en koshuis se getalle het geweldig toegeneem vanjaar en hierdie skenking word ontsettend waardeer," sê Verwey.
Lea van der Vyver, voorsitter van die Aberdeen VLV-tak, het ook 63 Bybelgenootskap-werksboekies vir gr. 3 leerders aan Verwey oorhandig. Tydens die vergadering het Verwey meer vertel van die skool en leerders en uitgebrei op die tipiese uitdagings wat personeel in die gesig staar by 'n kleindorpse plattelandse skool: "Dit is 'n kopskuif om te aanvaar – begin by jouself en dink konstant vernuwend." Sy het verduidelik dat 'n mens moue oprol en alles eenvoudig maak werk.
Verwey het beklemtoon dat die nuwe skoolhoof, Mnr Constable, 'n besliste positiewe verskil by die skool bring en 'n enorme impak maak. 'n Groot ideaal en droom is om sportvelde vir die skool te ontwikkel. "Sport speel so 'n belangrike rol in 'n kind se ontwikkeling, veral op die platteland waar daar nie veel ander afleiding is nie." Verwey en die VLVdames het 'n dinkskrum gehou oor hoe die uitdaging benader kan word.
Maryke Lategan, saamroeper van Opvoeding & Kultuur (& Gesondheid), het daarna gesels oor geestesgesondheid met die fokus op selfbeeld – kenmerke van 'n goeie selfbeeld teenoor díe van 'n swak selfbeeld. Sy het die verband getrek tussen Pilates-oefening en verbetering van die selfbeeld.
Lategan het 'n paar oefeninge gedemonstreer en die dames genooi om self van die oefeninge te doen.
Alex Lombaard