Rubberkoeëls afgevuur tydens vergadering
Teresa Opperman
Ongeveer agt sekuritietswagte het verlede Donderdag, 18 April, op inwoners van Michausdal begin skiet nadat 'n beplande vergadering met die burgemeester van die Inxuba Yethemba Munisipaliteit (IYM) Raadslid Noncedo Zonke, by die Sonskynsentrum, nie volgens plan verloop het nie. Daar word vermoed dat dit rubberkoeëls was.
Sedertdien is talle strafsake deur inwoners, asook Kobus Botha, MEC, Oos-Kaap Middellande Kiesafdelingsleier, by Cradockpolisie aanhangig gemaak, rakende aanranding en die onwettige afvuur van vuurwapens in 'n beboude gebied.
Die bespreking van die geïntegreerde ontwikkelingsplan was op die agenda.
Botha sê dat hy self dié vergadering bygewoon het om die kwessie oor die koshuis by die Michausdal Senior Sekondêre Skool te bespreek toe die skote begin klap het. Hy sê dat Zonke botweg geweier het om inwoners se vrae te beantwoord, en toe uit die vergadering gestap het. "Sy het met haar privaat gehuurde sekuriteitswagte uitgestap terwyl hulle die skare beheer het om 'n pad vir haar oop te maak om die vergadering te verlaat," sê Botha.
Ooggetuie
DA Raadslid vir Michausdal, Bettie Lawens, het as voorsittende beampte vir Michausdal opgetree tydens die vergadering, en sê dat die gemeenskap nie die teenwoordigheidsregisters wou teken voor Zonke hulle nie eers ingelig het rondom die voortslepende kragsituasie nie. "Elektrisiteitstoevoer is al sedert 2 Februarie deur IYM geblok om inwoners van Wyk 4 wat agterstallig op hulle munisipale rekeninge is, te forseer om ten minste 25% van die agterstallige geld te vereffen," sê Lawens. Sy sê dat inwoners wat die stappe gevolg het wel krag kon koop, maar dat wanneer hulle weer wou koop, die rekening geblok is en alle stappe moet van voor af gevolg word om toegang tot krag te verkry.
Volgens haar het Zonke geweier om met die bespreking van die ontwikkelingsplan voort te gaan voordat die register nie deur die inwoners onderteken word nie. "Zonke het ook gesê dat sy nie tydens die geleentheid antwoorde gaan verskaf rondom die kragsituasie nie," sê Lawens.
"Die gemeenskap het toe na die saal teruggekeer om met die Michausdalbelastingbetalersvergadering voort te gaan, maar is onderbreek deur die IYM munisipale bestuurder, Mkhulili Nbebe. Hy het aan hulle gesê dat dié vergadering nie mag voortgaan nie. Daarna het agt sekuriteitswagte die skare na buite vergesel. Die gemeenskap was nie bewapen nie, maar daar het skielik skote begin klap toe inwoners nie die area wou verlaat nie." Volgens Lawens het sy self die vergadering verdaag en die saal 'n geruime tyd na
Zonke verlaat.
Petrus Plaatjies, skakelpersoon van Michausdal-belastingbetalers sê dat daar talle inwoners is wat geen geld aan die IYM verskuldig is nie, maar sonder krag sit.
Geen kommentaar
Advertiser het intussen verneem wie die sekuriteitsmaatskappy was wat op die skare geskiet het, en wie aangestel is om die burgemeester en haar geselskap te beskerm. Die Advertiser het telefonies en per e-pos met die sekuriteitismaatskappy probeer kontak maak, maar tot op hede geen terugvoering ontvang nie.
Die Advertiser het ook telefonies met Zonke gesels. Sy het telkens belowe om terug te skakel, maar tot op hede het sy nie dié belofte nagekom nie.
Strafsake
Volgens kapt. Namhla Mdleleni, woordvoerder vir die Oos-Kaap Polisie, is daar ses strafsake by die Cradock Polisiestasie geopen, met aanklagte wat wissel van aanranding tot die onwettige afvuur van 'n vuurwapen in 'n beboude gebied.
Mdleleni sê dat die burgemeester van IYM glo 'n vergadering gehou het wat nie na wense verloop het nie en dat inwoners diensleweringkwessies wou bespreek. Volgens Mdleleni het daar 'n argument onstaan en het sekuritietiswagte glo probeer om die skare uiteen te jaag deur rubberkoeëls af te vuur.
Volgens Mdleleni het net een persoon beserings oopgedoen, maar die Advertiser is in besit van talle foto's van inwoners met wonde wat op die oog af soos rubberkoeëlwonde voorkom. Die polisie is besig om die saak te ondersoek.
Terwyl inwoners van Wyk 4 onder swak dienslewering en klagtes oor die onbegaanbare toestand van paaie en geblokkeerde kragtoevoer steier, wonder hulle ook nou of daar ooit vrae op hulle antwoorde gegee gaan word en dienslewering na die insident gaan verbeter.
Lees vorige artikel, Appaling conditions at Hostel, by graaffreinetadvertiser.com