Twee ystervrouens pak Ysterman aan
Sonia Wahl
Twee ystervroue van Graaff-Reinet, Elise Steynberg en Tanya Fourie het onlangs aan die Isuzu Ironman Nelson Mandela Bay Triathlon, deelgeneem. Die kompetisie het op 21 April in Gqeberha plaasgevind en uit drie afdelings, 3,8 km swem, 180 km fietsry, en 42,2 km hardloop, bestaan.
Steynberg het al aan vyf Ystermankompetisies deelgeneem, en hierdie was haar derde volle Ysterman wat sy voltooi het - die ander twee kere was daar probleme in die wedren se swemafdeling. Sy het reeds verlede jaar September vir hierdie wedren begin voorberei en sê dat sy gedurende en aan die einde van die dag goed gevoel het. "Ek het geen besering opgedoen nie, na die tyd het ek so ’n paar dae gerus en toe weer stadig begin oefen."
Vir Fourie was dit haar eerste volle Ysterman-kompetisie, maar sy het darem ook 'n voorsmakie gehad van wat voorlê, aangesien sy al aan drie halwes deelgeneem het.
Steynberg en Fourie vertel dat hulle voorbereiding vir die kompetisie ietwat verskil het, maar dat wanneer hulle oor naweke langer afstande moes inwerk, hulle wel saam geoefen het.
"Ons het mekaar deurlopend ondersteun gedurende ons voorbereiding," vertel Steynberg. Steynberg het die wedren in 14 ure en 14 minute voltooi en Fourie in 14 ure en 12 minute.
Fourie vertel dat as iemand graag aan die Ysterman-kompetisie wil deelneem, hulle definitief moet weet, dit vat baie ure se voorbereiding en dat jy baie opofferings moet maak om by jou oefenprogram te bly.
Steynberg vertel dat om aan hierdie tipe kompetisies deel te neem, deursettingsvermoë verg. Wanneer jy vra wat hulle raad aan iemand is wat graag aan hierdie kompetisie wil deelneem, sê Steynberg dat jou voorbereiding goed moet wees.
"Ironman is op die dag die celebration van al jou harde werk wat jy ingesit het om al drie afdeling op een dag te kan voltooi. Soos die Ysterman-leuse lees, anything is possible - my gunsteling oomblik is wanneer jy op die rooitapyt hardloop en die aankondiger sê: Elise Steynberg, you are an Ironman, dis 'n oomblik wat jou bybly, wat al jou ure, dae en maande se bloedsweet die moeite werd maak."