Vandale dra museum leeg
Teresa Opperman
Met haar weeklikse Sondagoggendstappie deur Steynsburg, het 'n verbaasde inwoner, Kathy Bezuidenhout, gesien dat die Steynsburg-museum se voordeur oopstaan. Bezuidenhout werk buite die dorp en het net Sondae tyd om die stappie in te werk.
By nadere ondersoek het sy gevind dat die museum slegs 'n dop was. Vandale het deur 'n gat in 'n agtermuur toegang tot die gebou gekry, en al die historiese erfenis daarin verwyder - daar is niks in die vertrekke oor nie.
Hierdie museum was die lewensroeping van Hannie Steyn, 'n inwoner van die Marais Steyn-tehuis in Steynsburg. Sy het ook talle boeke oor Steynsburg en die geskiedenis van dié klein Karoodorpie, geskryf.
Coreen Steyn, ook 'n inwoner van die tehuis, het haar in die afgelope jare begin bystaan, en dié twee het gereeld besoekers deur die museum geneem. Die twee inwoners van die Marais Steyn-tehuis, oorkant die museum, is erg geskok nadat dié toedrag van sake Sondagoggend aan die lig gekom het.
Hierdie was nie die enigste inbraak nie, Bezuidenhout vertel dat daar die afgelope week ook inbrekers in die Metodiste Kerk reg langs die museum was en dat 'n inwoner hulle opgemerk en verwilder het.
Bezuidenhout vermoed dat die plundery oor die laaste week gebeur het, "Ek stap elke Sondagoggend met my honde daar verby en hulle het dadelik onraad vermoed en my gewaarsku."
In die onlangse verlede het Sigi Howes, 'n welbekende historikus, die museum besoek. Vandag is daar niks.
'n Saak van inbraak en vandalisme is by die plaaslike polisie geopen en word ondersoek.
'n Verklaring vanaf die Oos-Kaapse kommissaris, lt. kol. Siphokazi Mawisa, word afgewag, wat telefonies meegedeel het dat inligting nagegaan word.