HVS se rugbyspanne wen
Hoër Volkskool (HVS) het van 1 tot 4 Mei hulle jaarlikse Rugbyweek aangebied en skole vanuit verskeie streke het die geleentheid bygewoon. Die rugbyspanne het op 1 Mei in Graaff-Reinet aangekom en die week se rugby is met 'n gesellige seremonie begin waar egte Karoo-gasvryheid die spelers welkom laat voel het.
Die wedstryde het Donderdagoggend om 08:00 begin. Dit het goed gegaan met Hoër Volkskool se twee spanne wat op dié dag deelgeneem het. HVS se o.16-span het oortuigend teen St. Andrews van Bloemfontein, met 'n telling van
40 - 0 gewen.
Die eerste span het later die middag teen Hoërskool Langenhoven van Riversdal uitgedraf en die wedstryd 47 - 0 gewen. Drieë is deur JanTheo van Tonder, Ashwill Swarts, Ethan Davids, Pieter van der Merwe gedruk en Curwin Niemand kon twee keer deurbreek om drieë aan te teken. Skopwerk is deur AJ de Jager behartig.
Vrydag het die spelers ‘n ekstra oefensessie ingewerk en sommige spanne het die dorp en sy toeristetrekpleisters besoek. Die aand het
Van der Aven, ‘n nuwe opkomende Afrikaanse musiekgroep, die spanne in die skool se vierkant vermaak.
Die area is omskep in ‘n waardige buitelugteater met kosstalletjies om by te dra tot die feestelike atmosfeer.
Saterdag het die rugby weer vroegoggend begin en alhoewel dit baie warm en winderig was, het die dag goeie resultate vir HVS ingehou. Die o.14rugbyspan het 22 - 12 teen Hoërskool Middelburg gewen en die o.15-span het behoorlik koning gekraai met 'n telling van 57 - 5 teen Glenwood House van George. Die o.16-span het 18 - 12 teen Hoërskool Langenhoven gewen.
Die beste was die eerste span se wedstryd teen Hoërskool Piketberg. HVS het gesorg dat die rugbyweek op ‘n hoogtepunt afgesluit word met 'n telling van 31 - 7. Drieë is deur Pieter van der Merwe, Ethan Davids (2) en Jan-Theo van Tonder (2) aangeteken en die skopwerk is deur
Elrico Prins gedoen.
HVS kyk terug op ‘n baie suksesvolle en lekker naweek van rugby, spanwerk en gesonde kompetisie.