Isaqhuba itumente yebhola ekhatywayo EJD Dlepu
Inkwankca ibiqhaqhazelisa amazinyo, ivalele abathandi bebhola ezindlini ngecawa edlulileyo, kodwa elogcuntswana lidele loo ngqele ligoduke lixolile. Kumdlalo wokuqala iintshatsheli ze-makana LFA, i-city Pirates, ibhuqe i-future Stars ngamanqaku amane kwelinye kumdlalo obuthande ukekelela calanye. I-makana Pillars yona izibethele i-riebeck City ngamanqaku amathathu kwamabini, logama i-joza Callies iphumelele ngee-penalty emva kokuba ibambene ngamanqaku amabini macala ne-young killers.
Kumdlalo otsale umdla weloqaqobana labalandeli, i-jacaranda Aces ivene amandla ne-newseekers. Lomdlalo uqale kakuhle omabini lamaqela ezimisele efunza edabini. Kuye kwabonakala nje zisuka ukuba lamaqela agqibele kudala udlala, nanjengoko ebebonakala ebuthundu phambi kweepali. I-jacaranda Aces iye yophisa kuqala emva komdlalo omhle oqale esazulwini sebala kodwa nayo i-newseekers ayikhange iyekelele.
Kuyiwe ekhefini inkqenkqeza ngenqaku elinye eqandeni i-aces. Omabini lamaqela abuye aqinisa ngakumbi kwisiqingatha sesibini ezama inqaku kodwa kwanzima. I-jacaranda iye yayekelela umxakatho, nto leyo ebangele ukuba i-newseekers ibuye ngamandla inkqunkqa ibuyelela kwiipali zeaces, kodwa abadlali bayo bagquduza bejongene nqo nonozinti izihlandlo ezininzi. Kwimizuzwana nje elishumi phambi kokuba kuphele umdlalo i-newseekers iye yafumana i-penalty emva kokuba umdlali wangasemva we-aces ebambe ibhola ngaphakathi ebhokisini. I-newseekers iye yalifaka elo nqaku ilinganisa amanqaku.
Omabini lamaqela asebenze nzima ezama inqaku lempumelelo kodwa atsho phantsi kwaqhuma uthuli. Uphele umdlalo ebambene ngenqaku elinye macala. I-jacaranda Aces iye yaphumelela ngamanqaku amahlanu kwamathathu kwiipenalty. Imidlalo eyandulela owamanqam izakudlalwa ngomgqibelo, owokuqala ngentsimbi yokuqala, kuze owesibini uqale ngentsimbi yesithathu E-JD Dlepu. Owamanqam umdlalo uyakubanjwa ngecawa ngentsimbi yokuqala.