Kode kube phi na
The imbongi is concerned about the scarcity of water and loadshedding that the people are experiencing. Now Corona virus seems to be on our doorstep and we are told bombarding it with water is the best weapon. Education has been affected by this too. Kophendula banina ke ingenguwe waziyo?
Besisahleli ngamxhelo mnye Sibaliselana iimbadu ngase buhlanti Sisitsho ngeentsomi zethu
Sisothe iimbawula zethu Singaphanganga mntu wethu
Siqale sabona ngobuqhophololo bokungaphumi kwamanz' ezimpompeni
Sadl'amathamb' engqondo kwaqhekeka iintloko
Kwanzima nokusul' iintongo
Senjenjeya ukuquqela kwiimpompi ezikude
Nala wendalo amanzi asinqabela
Kwanyanzeleka siwafumane ngexabiso
Wasitsho elukhakhayini yena ueskom Samayamayaza saphithizela siqoshelis' ezexabiso Samkelwa ziinkomo neebhokhwe ngobusuku Sahluthelwa omakhal' epokothweni Saqhekezelwa iimizi ngabo kuthiwa ngamaphara
Kode kube nini na madoda?
Mabaze kalok' abaprofeti njengeemboni Bekutheni bengasixelelanga ngalo bhubhane? Nokwenza isibulala mntu ukhorona
Kanene baza kusithengisela impiliso
Ebengathangan' urhulumente uxhobile Ebengathangana yena uyakukumela oku Ngoku izikolo ziyavalwa nendawo zendibano Kunamhlanj' ilizwe liqubudile
Ngulo bhubhane wesigebenga
Ucoceko bantu bakuthi luyathengwa
Hlamba izandla rhoqo rhoqo!
La manzi angekhoyo siza kusinda njani na? Phendula mfo kamphahlwa
Sele inguwe ithemba elikufutshane nathi Unganguye na umosisi wanamhlanje?
Ukuba unakho nceda nants' imakhanda kuqala.