Huisgenoot Beste Resepte: Braai
LIEWER VLEIS AS SAMPIOENE
Die samesyn om die braaivleisvuur is vir Mej. Suid-Afrika, DemiLeigh Nel-Peters, die grootste aantrekkingskrag van braai.
“Ek hou die meeste van die geselskap. Daar is net iets omtrent braai wat mense bymekaarbring – dis so gesellig.”
Vir dié skoonheid is ’n braai sinoniem met vleis. “Stel jou voor dat jy net ’n gebraaide sampioen eet! Dit speel die ondersteunende rol.”
Demi-Lee is mal oor ’n sappige stukkie kruisskyf, oftewel rump, en klewerige varkribbetjie. “Rump het van al die snitte die meeste geur, maar is steeds sag.” Sy eet haar steak graag saam met aartappelslaai of een van haar gunstelinge, pap en sous. “En wat kan jy sê oor ’n lipleklekker klewerige ribbetjie wat letterlik van die been afval . . .”
Demi-Lee voel braai is ’n gebruik waarby talle Suid-Afrikaners aanklank vind. “Braai, shisa nyama, barbecue, noem dit wat jy wil – dis alles deel van ons kultuur en ’n fees! “