Huisgenoot Beste Resepte: Braai
NIKS SOOS ’N KERRIEPOT
Soos ’n mens van Suid-Afrika se braaikoning Jan Braai (oftewel
Jan Scannell) kan verwag, hou hy daarvan om byna enigiets op die kole gaar te maak – van potjies en vis tot lamsvleis en steak.
Een ding moet hy hê wanneer hy braai: ’n groot houtvuur. “Ek is glad nie ’n fan van houtskool of gas nie,” sê hy. Jan, die stigter en ambassadeur van Braaidag, sê ’n goeie voorraad droë hout is uiters belangrik sodat jy ’n groot vuur kan maak.
Tweede op sy lysie van moethêdinge is ’n potjie. “Daarsonder kan ek nie ’n behoorlike braaimaaltyd maak nie.”
Wat braai Jan Braai die graagste? “Ek is mal oor ’n hoenderkerriepotjie. Die hoender word supersag wanneer die potjie stadig kook en kerriespeserye is ’n wonderlike manier om hoender baie geur te gee.”
Nog van Jan se gunstelinge sluit in vars geelstert op die kole en dikrib saam met krummelpap en skerp tamatiesmoor of chakalaka.
En vir ’n sonnige somernamiddag is daar vir hom beswaarlik iets beter as lamslendetjops met ’n bietjie sout, knoffel en suurlemoen saam met ’n glas witwyn.