Huisgenoot - Ware Lewensdramas
7JAAR LATER
Ná Jason se skuldigbevinding en vonnis het hy alles probeer om uit die tronk te bly.
Jason se regspan het teen die uitspraak en vonnis geappelleer, maar hul appèl is deur regter Gayaat Salie-Hlope van die hand gewys.
Daarna het hy hom tot die appèlhof in Bloemfontein gewend.
Op 2 Julie 2019 is sy aansoek om verlof tot appèl toegestaan, en in Desember het ’n volbank regters ook sy appèl om borgtog toegestaan.
Net voor Kersfees het hy uit die Drakensteintronk in die Paarl uitgestap om die Feestyd saam met sy dogters in Plettenbergbaai deur te bring.
Hy is op streng voorwaardes en borgtog van R200 000 vrygelaat hangende sy appèlsaak. Hy moes ’n waarborg van R1 miljoen gee.
In Februarie 2020 het ’n Huisgenoot-joernalis Jason opgemerk waar hy saam met vriende in ’n restaurant in Melkbosstrand kuier. Hy was aansienlik maerder en gryser as met sy hofverskynings.
Op 5 Oktober 2021 het die appèlhof bevind daar was geen bewyse dat Jason Susan met ’n kussing versmoor of met die vuis aangerand het soos Salie-Hlope bevind het nie, en dat dit bloot bespiegelings is.
Die volbank regters het wel die patologiegetuienis bekragtig dat Rohde haar verwurg het. Hulle het sy vonnis tot effektief 15 jaar verminder.
Op 20 November het Jason homself aan die polisie in Stellenbosch oorgegee. Daarvandaan is hy na die Drakensteingevangenis buite die Paarl geneem, waar hy sy tronkstraf uitdien.
Ook Jolene het haar in die beskuldigdebank bevind nadat sy kort ná Jason se vonnisoplegging die twee ondersoekbeamptes, Marlon Appollis en Stephen Adams, op die polisie se Facebookblad gekritiseer het.
Sy het ook in ’n boodskap aan die Cape Argus teen die nasionale vervolgingsgesag en Salie-Hlophe uitgevaar.
Jolene het die saak bestempel as ’n “poging deur die staat om ’n misdaad te skep wat nooit gebeur het nie”.
Jolene het die plasing uitgevee kort nadat dit geplaas is en haar Facebookprofiel verwyder.
Sy is aangekla van crimen injuria, maar het kort daarna verskoning gevra.
Nadat sy vroeg in 2020 in die landdroshof in Kaapstad verskyn het, is die saak teen haar teruggetrek.
Jolene is intussen ook weg by Sotheby’s.