Só het die drama ontvou

MAART 2002 Cézanne Prinsloo trek die publiek se aandag toe sy aan Idols deelneem – nie oor haar stem nie, maar oor haar uurglaslyfie met haar 34DD-borste. Adv. Barbie, soos sy daarna genoem word, vertel hoe lief sy haar verloofde, Dirk Prinsloo, het en dat sy klaar sy van gebruik – en dat hy haar van ’n platborsboekwurm in ’n eksotiese vlinder laat ontpop het. Die paartjie het vroeër ’n interdik teen Cézanne se ma, Susan Lemmer, gekry om haar te verbied om met die media oor hul sake te praat.

19 DESEMBER 2002 Adv. Barbie en Dirk Prinsloo word op hul kleinhoewe buite Centurion in hegtenis geneem nadat die polisie op dagga en “onwelvoeglike materiaal’’ beslag gelê het. Voorvalle van onsedelike aanranding op minderjariges, poging tot moord, die besit van verbode middels en kinderpornografie word ondersoek.

24 DESEMBER 2002 Albei word op borgtog van R4 000 vrygelaat.

JANUARIE 2003 Cézanne kondig aan hul verhouding is verby. Haar van is nou weer Visser en sy is terug by haar ouerhuis. Sy bied aan om in die hof teen Dirk te getuig, maar die staat weier. Hulle word saam van 14 oortredings aangekla.

FEBRUARIE 2003 Cézanne en Dirk praat op Valentynsdag weer met mekaar en gaan vir ’n Valentynsnaweek na die Magaliesberge, waar hulle mekaar “weer vind’’.

JULIE 2003 Terwyl hulle tot Januarie 2004 moet wag vir hul volgende hofverskyning, vertel ’n sekswerker van die “sessies’’ waarvoor hulle haar duisende betaal het. In dieselfde maand word die aanklagte teruggetrek, maar skaars ’n dag later word hulle weer in hegtenis geneem.

SEPTEMBER 2004 Gruwelverhale ontvou in die hof oor

kinderhuiskinders wat misbruik is, 70 pornografiese video’s en 12 foto’s waarop ’n volwassene en twee minderjarige meisies naak verskyn. Die twee vra die staat om hul paspoorte terug te gee en sê hulle beplan nie om die land te verlaat nie.

JANUARIE 2005 Hul verhoor begin in die hooggeregshof in Pretoria.

JULIE 2005 Die verhouding is finaal verby en Cézanne is terug by haar ouerhuis. Haar borsprosteses word verwyder.

NOVEMBER 2005 Dirk lig die hof in hy gaan Kersfees in Rusland deurbring. Omdat dit sy tweede besoek aan dié land is en hy nie as ’n vlugrisiko beskou word nie, word sy borgtog bloot tot R20 000 verhoog.

APRIL 2006 ’n Week voor sy verhoor vertrek Dirk vir “sake’’ na Rusland. Hy keer nie terug nie en Interpol soek na hom. Cézanne staan alleen in die hof tereg en stort emosioneel ineen.

SEPTEMBER 2006 Cézanne word vir psigiatriese waarneming opgeneem nadat haar advokaat beweer Dirk het haar so gemanipuleer dat sy nie tussen reg en verkeerd kon onderskei nie.

JUNIE 2009 Dirk word ná ’n mislukte bankroof in Belarus in hegtenis geneem.

7 OKTOBER 2009 Cézanne word in die hooggeregshof in Pretoria skuldig bevind op 11 aanklagte wat verband hou met onsedelike aanranding, die vervaardiging en besit van kinderpornografie en bedrog.

JANUARIE 2010 Dirk se verhoor begin in Belarus.

FEBRUARIE 2010 Dirk word in die distrikshof in Baranowitsji, Belarus, tot 13 jaar tronkstraf gevonnis nadat hy skuldig bevind is op aanklagte van diefstal, bankroof en boewery.

24 FEBRUARIE 2010 In Suid-Afrika word Cézanne tot sewe jaar gevangenisstraf gevonnis.

17 MEI 2010 Cézanne begin haar vonnis uitdien in die Kgosi Mampuru-gevangenis in Pretoria.

19 AUGUSTUS 2013 Cézanne word op parool vrygelaat.

2 JANAURIE 2017 Cézanne se straf verstryk.

DESEMBER 2018 Dirk word uit die tronk in Belarus vrygelaat.