DIE OLIMPIESE LEUSE

2008-Spele in Beijing, China

Die Jamaikaanse naelloper Usain Bolt het in 2008 nie net die goue medalje in die 100 m en 200 m gewen nie; hy het ook in albei nommers ’n wêreldrekord opgestel. Dit was die eerste keer dat albei dié rekords by een Spele verbeter word. Mense was verstom om te sien dat hy die 100 m in 9.69 sek. afgelê het, selfs nadat hy teen die einde van die wedloop stadiger begin hardloop het om sy oorwinning te vier. Usain en sy drie spanmaats het toe nog die 4 x 100 m-aflos ook gewen. Vier jaar later, by die Spele in Londen, het hy dit weer gedoen – drie goue medaljes. Die leuse van die Spele is Citius, Altius, Fortius – Latynse woorde wat “vinniger, hoër, sterker” beteken. Die leuse is in 1894 met die stigting van die Internasionale Olimpiese Komitee in gebruik geneem. Die doel daarvan is om die deelnemers aan te spoor.