‘DOODLES’ EN GEKKEDAGSTREKE
Larry en Sergey het nog altyd van pret gehou. Een van Google se gewildste truuks is hul “doodles”, die aanpassing van hul soekenjinlogo om te fokus op belangrike geskiedkundige gebeure of spesiale oomblikke op die wêreldkalender. Dit het in 1998 begin, met ’n stokmannetjie in die logo en ’n aankondiging dat die hele Google-span stokkiesdraai om die Burning Man-fees in die woestyn in Nevada by te woon.
Twee jaar later was Larry en Sergey so in hul noppies met die reaksie op ’n doodle vir Bastilledag dat hulle spesiaal ’n “chief doodler” aangestel het. Eers is meestal vakansiedae so gedenk, maar deesdae kan alles van die lewe van baanbrekers tot die Wêreldbekersokkertoernooi en die ontstaan van die draairoomys ’ n Googledoodle regverdig.
Google geniet ook Gekkedaggrappe. Op 1 April 2000 is gebruikers genooi om “Google MentalPlex” vir websoektogte in te span. Hulle moes dink aan ’n geestesbeeld van wat hulle soek terwyl hulle na ’n “spesiale” geanimeerde prentjie op die Googleblad staar.
Dan sou foutboodskappe opdoem, soos Error 666: Silence voices in your head and try again, en Error 01: Brainwaves received in analog; please rethink in digital.
Op Gekkedag 2007 het Google ’n gratis internetdiens genaamd TiSP, oftewel Toilet Internet Service Provider, aangekondig. ’n Mens kon ’n gratis internetverbinding verkry deur bloot die een end van ’n optiesevesel-kabel in jou toilet af te spoel. En so was ons al almal Googlegekke.