KRYGSUNIFORMS
Die reëls vereis dat net werkende koninklikes op groot geleenthede uniforms dra. In die aanloop tot die begrafnis het koning Charles, prinses Anne, prins Edward en prins William dus uniforms gedra.
Prinse Andrew en Harry, wat nie meer werkende koninklikes is nie, moes gewone pakke dra, maar kon darem hul militêre medaljes daaraan vasmaak. Ironies is dié twee die enigste lede van die familie wat inderdaad ooit in oorlogsones diens gedoen het – Andrew in die Falklandoorlog en Harry in Afganistan.
Die twee kon wel by die waak langs die koningin se kis in Westminster Hall krygsdrag dra. Blykbaar was Harry ontevrede toe hy vertel is hy kon nie ’n EIIR-kenteken (huldeblyk vir die koningin) op sy skouer dra soos al die res nie. Selfs Andrew kon dié embleem dra.
Die meeste manslede van die koningshuis doen ’n jaar of twee lank in die weermag diens.
Koning Charles was in die lugmag en die vloot. As troonopvolger mag hy nie in oorlogsones geveg het nie. Noudat hy koning is, word Charles die nuwe hoofbevelvoerder van die Britse weermag.
Andrew was 22 jaar lank in die vloot en het in die Falklandoorlog in 1982 as helikoptervlieënier opgetree. Hy beklee steeds die rang van viseadmiraal van die vloot.
Nadat William in 2005 aan die Universiteit van St. Andrews gegradueer het, het hy by die Royal Military Academy in Sandhurst ingeskryf. In 2009 het hy by die lugmag en die vloot aangesluit, en in 2010 het hy drie jaar lank ’n helikopter in die Angleseygebied gevlieg.
Harry was 10 jaar in die gewapende magte. Hy het eindelik die rang van kaptein behaal en twee keer in Afganistan diens gedoen.
Anne was nooit in die weermag nie, maar het nogtans die geboortereg om ’n seremoniële vlootuniform te dra. Sy is in 2012 selfs as ere-admiraal aangestel.
Nadat prins Edward ’n universiteitsgraad verwerf het, het hy by die mariniersoldate aangesluit, maar hy het sy opleiding opgeskop voor hy dit voltooi het.