ELDERS IN DIE WÊRELD
14-JARIGE KRAAK KODE OP NUWE MUNT
Die Australian Signals Directorate (ASD), ’n regeringsagentskap wat verantwoordelik is vir die hantering van geheime boodskappe en help om die land teen kuberkrakers te beskerm, het ’n spesiale 50c-muntstuk uitgereik om hul 75ste bestaansjaar te herdenk (sien Woord van die Week). Die spioenasie-agentskap het onthul die muntstuk het vier lae kodes wat boodskappe oor die ASD bevat. Binne ’n uur nadat dit uitgereik is, het ’n 14-jarige seun van Tasmanië ál vier lae uitgepluis. Die ASD-direkteur, Rachel Noble, het gesê dié wat die kode kan kraak, kan dalk “’n toekomstige loopbaan by ons hê”.
GEREDDE DOLFYN STERF
’n Siek irrawaddydolfynkalf wat uit ’n getypoel in Thailand gered is, is dood. Die soogdier se redders het hom Paradon gedoop, wat rofweg vertaal word as “broederlike las”, want hulle het geweet dit sou moeilik wees om sy lewe te red.
Veeartse en vrywilligers het die swak dolfyn meer as ’n maand lank by ’n Thaise navorsingsentrum melk gevoer en versorg. “Al kon ons nie Paradon se lewe red nie, het ons baie geleer. Min mense het al irrawaddydolfyne versorg,” het ’n veearts, Oranee Jongkolpath, gesê. Dié dolfyne se voortbestaan word deur habitatverlies, besoedeling en visvangpraktyke bedreig.
KERNAANLEG SLUIT
Zaporizja, die grootste kernaanleg in Europa en een van die grootstes ter wêreld, is gesluit terwyl Rusland se inval van Oekraïne steeds voortduur.
Zaporizja is die afgelope maande gereeld deur Russiese magte aangeval, wat veroorsaak het dat kenners dit weens veiligheidskwessies moes sluit. ’n Kernkragaanleg moet koel gehou word sodat dit nie oorverhit nie; dit produseer ook giftige afval wat met groot sorg gehanteer en geberg moet word.
Die groot gevaar van kernkrag is bestraling. As iets “radioaktief” is, beteken dit dat dit uitstraling afgee – energie wat in golwe beweeg. Hoë vlakke van bestraling kan siekte of selfs dood veroorsaak. Die aanvalle het die aanleg beskadig, en die meeste van sy reaktors is gesluit om ’n katastrofiese ongeluk te vermy.