UK.O usafisa ibuye iteargas
ISILOMO se- hip hop, UK.O ( osesithombeni), sithi ukuzikhukhumeza yikhona okuholele ekuhlukaneni kweqembu iteargas, ebeliyintandokazi kubathandi balo mculo eminyakeni edlule, futhi yikhona okwenza kube nzima ukuba libuyelane.
UK.O ogama lakhe langempela nguntokozo Mdluli, utshele ILANGA Langesonto ukuthi ubudlelwano bamalungu aleli qembu babuqinile ngaphambi kokuba lihlakazeke. Ubephawula ngemuva kokubuzwa yileli phephandaba ukuthi ngabe usefisa ukuba babuyelane yini nozakwabo.
Lo mbuzo ulandela umbhalo wakhe awufake ekhasini lenkundla yokuxhumana othi ngaphandle kukantukza noma-e (abebengamalunga eteargas) ngabe akekho lapho ekhona manje. “Bengiqonde ukwedlulisa ukuncoma kubafowethu abangisiza ngaba yilokhu engiyikhona. Sasinobudlelwano obuqinile kodwa bamosheka ngenxa yokuphakama,” kuchaza yena.
Uthi ngesikhathi bekhetha ukucula ngabodwana babehlose ukwenza into ethi kayicishe ifane neyemafikizolo. Babezokwenza ama- solo abo bese bebuyelana njengeqembu. Uthi esikhundleni sokuba kwenzeke lokho kwagcina sekumosheka ubungani. Uthi le mpi yaqala ngokuba aphumelele kweyakhe i- solo benoMA-E, besekana bonke kodwa kuNtukza kwangacaca kahle.
“Abalandeli baba nezinto abazishoyo ezingalungile - okusho ukuthi zafike zahlala kuntukza wagcina esezithatha njengeqiniso. Wayebuka sengathi mina nomfowabo (MA-E) sihlangene ngaye,” kusho UK.O oke washaya ingoma ethi Skhanda Love nonandi Madida.
Uthi kuthe uma sebewenzile ama- solo abo wathi makuhlanganwe kuqhutshekwe nomculo ngaphansi kwenkampani yakhe, icashtime Records. Uthi kakwehlanga kahle lokhu kuNtukza ngoba wayecabanga ukuthi bazoholwa nguye kwazise kwakuzosetshenziswa inkampani yakhe UK.O. “Icashtime kwakungeyami kodwa ngathi asiyisebenzise sonke khona sizokwazi ukuba siphushe ama- solo ethu khona,” kusho yena. UK.O uthi yinto angeke ayiphika ukuthi iteargas imbeke lapho ekhona njengamanje futhi basebenza kahle bendawonye. Uthi sebeke bayixoxa eyokuhlangana baphinde bakhiphe umculo kodwa bekungakenzeki. “Ngisenesifiso sokuba sisebenze ndawonye, sihloniphane sibe yimbumba, singenzi nje ngenxa yemali. Okwamanje kusemnyama kodwa ngethemba ukuthi unkulunkulu uzokhanyisa,” kuphetha yena. Njengamanje UK.O uthi umatasa ne- single yakhe yesibili emuva kwe- album yakhe ayikhiphe ngonyaka owedlule. Ngaphandle kwalokho umatasa nedocumentary echaza kabanzi ngokuthi usuka kuphi nelebuli yezimpahla zokugqoka iskhanda Republic.