Kuthinteka nosimphiwe Shembe emcimbini obangwayo
UYIHLEKA usulu eyokuvela kwegama likasimphiwe Shembe okuthiwa nguyena umsunguli wamahlaya odumo i-99% Zulu Comedy osebenze ukuwafukula, umnu Monwabisi Grootboom.
Lezi zinkulumo zilandela umbango nokudideka elibike ngakho leli phephandaba emasontweni amabili edlule phakathi kukagrootboom nomasipala weTheku. Itheku lithe ngawalo la mahlaya ngoba ugrootboom ubewaxhasa esasebenzela umnyango walo. Ngakolunye uhlangothi ugrootboom ubethi yingane yakhe lena.
Igama likashembe ongusomahlaya nomhleli wemicimbi yawo amahlaya, livumbuke kamuva. Umthombo osebenza ngawo amahlaya uthi ngushembe oqale ukuhlela amahlaya esizulu besafunda edurban University of Technology ngowezi-2005/2006.
Uthi ugrootboom ungene ngenxeba lemali njengoba ebenenkampani ehlela imicimbi, iwow Entertainment kanti kumasipala ubephethe umnyango osebenza ngazo ezobuciko wagcina ephenduka umagaya azidlele.
Uthi okushaye ushembe wukungazi ngemicikilisho yokubhaliswa kwamalungelo ngezinto ezinjena nakuba owakhe ubuvele ungabizwa nge-99% kodwa kungamahlaya nje esizulu. Umthombo uthi into engabangwa wumasipala nogrootboom yigama nje hhayi umqondo wokuwasungula.
“Umonwabisi uze wamenywa ngoba kuthiwa angasiza ngoxhaso nokuyilapho ethuthuke khona-ke kwaze kwazaleka i-100% Zulu Comedy egcine ishintshwa iba yi-99% ngoba sekumenywa nabangakhulumi isizulu,” kusho umthombo.
Umonwabisi uthi wudaba olufile nje lolu olulokhu lulandelwa. “Uyazi ngiphume emhlanganweni ngoba ngifuna ukukuphendula kodwa ngiyadumala ngale nto ongibuza yona ngoba ungimoshela isikhathi. Ngiyazi ufuna ukuzisekela ushembe usebenzisa igama lami. Wayengekho ngisaqala ukwenza amahlaya, kwakunosthe Khumalo, uflai nezinye izintwana zaseclermont. Sase sisebenzisana nanokhozi FM ngaleso sikhathi.
"Ushembe ngimaze ngoba ethulwe ngumadlokovu (Lindelani Ngema wokhozi FM). Baningi abanye abalandelile emva kwakhe ngibenzisa ama- audition adlule kuwona kwayena. Injalo nje indaba. Engathi mabakuhlele ngamaaudition hhayi i- show. Ushembe akanalutho angumnikazi wakho la kodwa konke kuzovela kwi- documentary engihlela ukuyiqopha ngemvelaphi yawo,” kuchaza ugrootboom egcizelela ukuthi yimbudane le.
Ushembe esethintwa uthe akathandi ukukhuluma kakhulu ngale ndaba. “Mina ngaya kumonwabisi ngemuva kokwelulekwa ngubaba ulindelani Ngema emuva kokumxoxela ngengikwenza esikoleni ngoba besazana. Ngafika ngamkhombisa i- video (Monwabisi) engangiyiqophile wase ecela ukuba simumeme ngokuzayo.
"Ngibona ukuthi wawuthanda lo mqondo nokwasisiza ngoba engabe kasikho la sikhona ukuba akalekelelanga," kusho ushembe omatasa nokuhlela umcimbi waminyaka yonke isimphiwe Shembe Comedy Picnic mhla ka-25 kwephezulu ebotanical Gardens.
Ujustice Kubheka ebelilokhu livela njalo igama lakhe, uthe ngusimphiwe umnikazi wendaba nongayichaza kahle ngoba nguye obexhumana ngqo nomonwabisi kusukela ekuqaleni. zowakha@ilanganews.co.za