AKAYIPHATHI EYOKUYOVELA EKHAYA
PASTOR, ngingowesifazane oneminyaka engama-34. Ngithandana nowesilisa oneminyaka engama-52 ubudala - sithandane naye kusukela ngowezi-2009.
Inkinga wukuthi akayiphathi eyokuyovela ekhaya, angazi noma wesaba umkakhe yini ngoba ushadelwe kodwa umkakhe usabuyela kubo, akasahlali naye. Ngicela ungisize ungitshele ukuba ngiqhubeke ngihlale naye noma ngibheke engxenye.
IMPENDULO: Ngiyacabanga ukuthi umbuzo wokuthi yini engayi ukuyovela kini kufanele uwubuze kuyena. Buza yena nokuthi uzimisele ngani ngawe.
Okwesibili seyiminingi iminyaka nihleli ndawonye kanti anazi nihlaleleni futhi niyaphi. Ngiyacabanga ukuthi ukuba kwakuyimfundo ngabe usuwazithola neziqu.
Ezimeni ezifuze lezi sisi ngicela uthathe le mfihlo ethi “akusiyona yonke into esiyiqondayo ngqo eyosombululeka kodwa ayikho into eyosombululeka sibe singayiqondi”.
Kunabantu empilweni ongasoze waphenduleka ngabo okufuneka ubaqonde ngqo ngoba uma ulokhu uzibuza uziphendula ngeke uyithole impendulo ngoba ikubo ngqo impendulo yokuthi baqondeni futhi baqondephi.
Ngeke kwambulala umuntu ukumbuza kodwa kuyombulala umuntu ukumcabangela kanti ubungazange umbuze. Empilweni ungake ulinge uzitshele into ongakaze utshelwe yona ngoba mhlawumbe yonke le minyaka ubulokhu uzitshela ukuthi uzovela kini kanti akakaze asho.
Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto.
Abafuna ukuxhumana naye noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo-10h00 ejewish Hall. Uma udinga ama-directions thumela ISMS ku: 078 419 1024