Bayanda abamnyama kwelezimbuzi
EZAMABHIZINISI: Bahlonyiswe ngolwazi lokufuyela ibhizinisi
KUBUKEKA banda abantu abamnyama abangena emkhakheni wokufuywa kwezimbuzi ngenhloso yokwenza ibhizinisi, ikakhulukazi abesifazane. Kuyaziwa ukuthi phambilini abantu abamnyama bebefuya nje ngoba imfuyo ithathwa njengento ebalulekile, hhayi ngoba inhloso bekuwukwenza inzuzo.
Ngasekupheleni konyaka owedlule ngike ngathamela ingqungquthela okwakuhlangene kuyo abafuyi ikakhulukazi abagxile ekufuyeni izimbuzi, ayayisethekwini.
Ukutheleka ngobuningi kwabafuyi bezimbuzi nalabo abafisa ukungena kulo mkhakha kucacise ukuthi impela baningi abamnyama asebenothando lwaleli bhizinisi.
Lena bese kuyingqungquthela yesibili ukuhlelwa yigoats Unlimited Company eholwa ngudkt Bandile Mkhize. Okunye futhi okwenyuse izinga lempumelelo yale ngqungquthela kwaba wuhlu lwezikhulumi ezikulo mkhakha, ezazivela ezindaweni ezahlukene, nasenamibia imbala, ezacobelela abafuyi ngezindlela ezifanele zokuqhuba lo msebenzi ngenzuzo.
Isiqubulo sayo le ngqungquthela ngonyaka owedlule sasithi “Goats: The Real Deal”. Umbono wegoats Unlimited Company uwukuba kufukulwe izinga lempilo yomphakathi ompofu wasemakhaya, ikakhulukazi abesifazane, ngokuba ukhuthazwe ukufuya izimbuzi.
Phakathi kokwashiwo ngudkt Mkhize emazwini akhe kwaba wukuthi sesiphelile manje isikhathi sokuba imbuzi yaziwe ngokuthi iyisilwane sokwenza umsebenzi wokuthetha idlozi.
UKUFUYA KWENDABUKO KUQHATHANISWA NOKWENZA INZUZO
Udkt Vuyokazi Mahlati ongusomabhizinisi ongomunye wabathule inkulumo kule ngqungquthela wathi ngaphandle kwenyama eminye futhi imikhiqizo yembuzi wubisi, ushizi, imvunulo noboya bayo okwenziwa ngabo impahla yokwembatha yezinga eliphezulu.
Waveza ukuthi maduze sekuzoba nesizinda sokusakaza ulwazi ngalo msebenzi.
Udkt Mahlathi wathi ukufuywa kwezimbuzi emakhaya sekumele kubukwe ngeso lokwenza inzuzo.
IBHIZINISI LEZIMBUZI
Umnu Roy Caldecott wehillan- dale Farm esehidcote, emidlands, uchaza imbuzi njengesilwane esihle kakhulu futhi esibekezelayo nesingavamile ukuhlupha. Weluleka abafuyi ngokuthi kuyisu elihle ukugxila ohlotsheni olulodwa. Umfuyi kusemqoka ukuba ayithande imfuyo yakhe futhi kuyinto elula lena kubafuyi besifazane ngokwemvelo yabo. Ukuzala kwensikazi amaphahla yikhona okuphokophelwe ngumfuyi ukuze aphumelele. Imbuzi enhle nephilile isiyakwazi manje ukuthengiswa ngo-r7 000. Ukugcina amarekhodi nakho kuthiwa kusemqoka ukuze umfuyi ayibone into ayenzayo. Ukufuya izimbuzi ngenhloso yokwenza ibhizinisi kuthiwa yinto eyahlukile, engeyikho nje ukuvula isango ekuseni ubuye ulivale ntambama. Okokuqala okusemqoka wukuba kube nompheme ukuze nxa lina zikhosele. Lokhu kuyasiza ukuba izinselo lezi zihlale zomile. Imiqengqe yokuziphuzisa namashalofu okuziphakela kumele kuhlanzeke. Okunye futhi okusemqoka wukuthi kube negumbi lalezo ezingaphilile ukuze zingatheleli ezinye. Kanti kubalulekile futhi ukuba izimpongo zingahlanganiswa nezinsikazi sonke isikhathi. Okunye okusemqoka kuthiwa wukunakekela amazinyane angafi ngoba ukukhula kahle kwawo angafi kulapho ibhizinisi lokufuya izimbuzi lenza khona inzuzo. Ukuzibala, uzikubeka uphawu nokuzibheka kusemqoka ukuze umfuyi angalahlekelwa.
UKUFUYA IZIMBUZI KUNEZIGABA EZININGI
Umnu Andrew Robertshaw useneminyaka engama-30 yena nomkakhe bekhiqiza ushizi wekhethe- lo ngobisi lwembuzi kangangoba inkampani yabo nomkakhe isihlonishwa ngokusezingeni LE-FSSC 22000. Emcimbini wokufungiswa kukamengameli Thabo Mbeki inkampani yabo yiyo eyabe iqokiwe ukuba ihlinzeke ushizi ngenxa yokwaziwa ukuthi umkhiqizo wayo usezingeni lekhethelo.
Wexwayisa abafuyi ukuthi balazi inani lomkhiqizo wabo futhi bangakuvumeli ukuqinelwa yizitolo ezinkulu ngoba zifuna ukwenza inzuzo ngokubacindezela ngokuthenga kubona ngamanani aphansi. Wonke umuntu ongena kule mboni kumele aqonde ukuthi kuqalwa kancane, umsebenzi ukhule ngokuhamba kwesikhathi.
IQHAZA LENTSHA NABESIFAZANE
Unkz Thato Moagi ongumlimi, naye owakhuluma kule ngqungquthela ngaphansi kwesihloko esithi, “Youth and Women in Goat Farming”, waqhakambisa ukubaluleka kokufukulwa kwabesifazane nentsha kuleli bhizinisi.
Waveza ukuthi kwelakubo elimpopo bahlongoza ukuqala umsebenzi omkhulu wepulazi lokuqeqesha (incubation farm) elizomumatha umhlambi wezimbuzi oyizi-10 000 - intsha izoqeqeshwa kulo isikhathi esingunyaka ngokufuywa kwezimbuzi.
Kuleli pulazi kwethenjwa ukuthi kuzokwenziwa yonke into ephathelene nomkhiqizo wezimbuzi phakathi kwayo yinyama, wubisi, nokushuka izikhumba. Kuyothi ngonyaka wesibili intsha eqokiwe ithunyelwe emapulazini ukuyofunda ngokubona (mentorship) bese iyadedelwa-ke ukuba izimele.