NGAPHANDLE KWENKUNDLA:
USEBENZISA iningizimu Afrika njengesitebhisi esibheke e-europe udeon Hotto Kavendji waseswakopmund, enamibia, ogijima kwibloemfontein Celtic edlala kwi-absa Premiership.
Lo mdlali uthi yize eseneminyaka engama-28 ubudala kodwa akalilahlile ithemba ngokuyodlala phesheya kwezilwandle.
Yize eqale ukudlala ibhola eneminyaka yobudala eyisi-6, kodwa ubone ukuthi uzokuya kude kunobhutshuzwayo esejoyine iblue Boys asuke kuyona waya kwi-african Stars.
Uyishiyile wafudukela eningizimu Afrika ezojoyina ilamontville Golden Arrows asuke kuyona esebheke kwiceltic.
Lo mdlali ufunde evrede Rede Primary naseherman Gmeiner Technical High School. Uhotto uzalwa ngudaniel nocontamcia.
Ingxoxo YELANGA Langesonto nohotto ngempilo yakhe yangaphandle kwenkundla ihambe kanje:
ILANGA Langesonto: Ukhona omunye umdlalo owukhonzile ngaphandle kukanobhutshuzwayo?
Hotto: Ngizifela kakhulu ngesurfing futhi ngiyingxenye enkulu yayo. Besinyenya njalo ekhaya nabafowethu u-edison novillar siyobuka abelungu bedlala lo mdlalo olwandle. Bagcine sebesifundisa wona wangena kanjalo-ke enhlizyweni yami.
ILANGA Langesonto: Injani impilo eswakopmund?
Hotto: Iyefana neyasethekwini. Idolobha elihle futhi eligabe ngolwandle oluhle. Yingakho ngingapheli nje ethekwini ngizodlala i- surfing ngoba ulwandle lwakhona lufana nolwangasekhaya.
ILANGA Langesonto: Uhlele ukwenzani ngemuva kokudlala ibhola?
Hotto: Ngizogxila kakhulu emkhakheni wokuhweba ngowoyela no-petrol. Sengivele ngiqalile ukungena kulo mkhakha. Phela inamibia icebile ngezimbiwa. Sengiqalile futhi ukuhweba ngezindlu enamibia.
Okwamanje amabhizinisi ami asesenamibia kuphela, kodwa azokapakela nalapha eningizimu Afrika nakwamanye amazwe angomakhelwane.
ILANGA Langesonto: Usugcagcelwe?
Hotto: Angikakashadelwa kodwa sesithembisene umshado nesinqandamathe sami ufasha, kanti sibusisiwe ngendodana udeco. Ngihlala nabo ebloemfontein.
ILANGA Langesonto: Ungumuntu onjani?
Hotto: Ngiwumuntu ongakuthandi ukuba wuvanzi. Ngikhonze ukuzihlalela endlini nabangani bami sidlale iplay Station. Angibuphuzi utshwala futhi angiwubhemi ugwayi. Ngikhonza echristian Family Church International.
ILANGA Langesonto: Yini eyokuqala oyenzayo uma uvuka ekuseni?
Hotto: Ngivuka ngiyogijima bese ngilungiselela ukuya ejimini.
ILANGA Langesonto: Ushwibeka ngaluphi uhlobo lwemoto?
Hotto: Ngisebenzisa ipolo GTI yezi-2017.
ILANGA Langesonto: Usebenzisa uhlobo olunjani lwesiqholo?
Hotto: Ngisebenzisa uhlobo lwetom Ford. Ingiphatha kahle kakhulu.
ILANGA Langesonto: Lukhona uhlobo olukhethekile olusebenzisayo ezimpahleni zokugqoka?
Hotto: Ngigqoka noma ngabe yini engifanelayo. Angiyena umuntu ophila impilo ewubukhazikhazi. Ngike ngasho phambilini ukuthi sengiqale amabhizinisi enamibia engisebenzela ukuthi athuthuke.
ILANGA Langesonto: Yisiphi isilwane osikhonzile nosesabayo?
Hotto: Ngithanda ikudu, kanti engisesabayo futhi engingasifuni yinyoka.
ILANGA Langesonto: Yiluphi uhlobo lomculo olukuhlaba umxhwele?
Hotto: Ngizifela kakhulu ngomculo wokholo, kanti ngithanda kakhulu ijesus Culture.
ILANGA Langesonto: Ukhona ezinkundleni zokuxhumana?
Hotto: Ngisebenzisa i-instagram nefacebook.
ILANGA Langesonto: Yikuphi ukudla okuthandayo?
Hotto: Ngizifela ngepapa nenyama eyosiwe.
ILANGA Langesonto: Yiliphi izwe ofisa ukuvakasha kulona?
Hotto: Ngizothola ukuphumula emoyeni mhla ngayozipholela emauritius.
ILANGA Langesonto: Yimaphi amazwe osuke wawavakashela?
Hotto: Sengike ngaya efrankfurt, egermany neqembu lesizwe langakithi.
ILANGA Langesonto: Yimaphi amakilabhu okhule uzifela ngawo?
Hotto: Yi-african Stars yasenamibia, ikaizer Chiefs yaseningizimu Afrika nereal Madrid yaseSpain.
ILANGA Langesonto: Ubukela kubani?
Hotto: Ucristiano Ronaldo uyisibonelo esihle kimina. Uhlale ezimisela ngaso sonke isikhathi futhi umqondo wakhe uwugxilisa ngqo kwakwenzayo.
ILANGA Langesonto: Uthini umyalezo wakho entsheni efisa ukufana nawe?
Hotto: Kungayisiza ukuqhela ezintweni ezingasile okungaba wutshwala nezidakamizwa. Kumele ikwenzisise ekwenzayo. Umuntu kumele azikhandle ejimini ngisho nasemidlalweni yobungani. Akumele intsha ilahle ithemba empilweni kodwa kumele ilwe kanzima ukufezekisa amaphupho ayo.