OBENAMASHEYA EZINYONINI UVUSA I-SWALLOWS BIG XV
KUZOKHETH’ ukhethi kubalandeli bemoroka Swallows Ltd ngekilabhu abafuna ukuyilandela njengoba sekuvuswa nemoroka Swallows Big XV okwaxebuka kuyona imoroka Swallows Ltd.
Ibig XV ivuswa ngucharles Makhubu obenamasheya kwimoroka Swallows phambilini. Uthi le kilabhu izobonakala kwisouth African Football Association (Safa) Gauteng ABC Motsepe League ngesizini ezayo.
Uthenge ilungelo levalencia lokugijima kulesi sigaba.
Kwenzeka lokhu nje, upanyaza Lesufi uphethe iswallows FC edlala kwigauteng Motsepe League. Ngesizini ezayo iswallows FC ingase idlale kwinational First Division (NFD) njengoba izama ukuthenga ilungelo lecape Town All Stars lokudlala kulesi sigaba.
Abeswallows FC balibeke ngesihloko elokuthi bona kabahlobene nakancane nemoroka Swallows Ltd edliwe yizembe ebholeni elikhokhelayo eminyakeni embalwa edlule. Baziqhelelanisile futhi nokubizwa ngezinyoni.
Nokho umakhubu ukusho kwagcwala umlomo ukuthi ibig XV iyizinyoni.
Ugcizelele ukuthi akahlangene nokwenziwa ngulesufi.
“Isitifiketi semoroka Swallows Big XV besivele sikimina. Phela ibhola lisemithanjeni yegazi kimina. Lifana nomjovo ongapheli. Sengiyithengile ivalencia FC.
"Kuyimanje ngimatasa nokusayinisa abadlali abasha ehhovisi leSafa. Ngifisa ukubuyisa udumo lwayo lwakudala lweminyaka ye-1960.
“Sengithathe no-ephraim ‘Shakes’ Mashaba esikhundleni sokuba ngusomaqhinga. Ngihlele inhlolokhono yabadlali ezokuba ngesonto (namuhla) ngo-10h00 ejohannessburg Stadium. Kangifisi kube khona ukuxabana phakathi kwabalandeli bawo womabili amakilabhu. Ngifuna ikilabhu yami idlisele ogageni ngokuphathwa kahle,” kusho umakhubu oveze ukuthi sekukhona abalandeli asebefuna ukuqala basungule amaziko.
Umoses “Skebhe” Khenyeza oke wayibamba kwimoroka Swallows Big XV, utshele ILANGA Langesonto ukuthi kuningi asakukhumbula ngale kilabhu. Uthi babedume ngesiteketiso sezinyoni kanti babephethwe nguJackson “Big Daddy” Sello nodavid “Pine” Chabedi.
Uthi wayeyibambe nojames “Akulalwa” Mabhena, u-amos Maseko, utornado Ntsibande, ujimmy Mahlangu, ushakes Mashaba owayeqeqesha aphinde adlale novader Mphosho osadlula emhlabeni. Uthi ukhumbula umdlalo wemainstay Cup ngowe-1979 owaphela ngo-5-5 bebhekene nekaizer Chiefs kubhoke upatrick “Ace” Ntsoelengoe e-orlando Stadium.