IZINXUSHUNXUSHU NGOWOBUHOLI BE-SAFA
KUQUBUKA izinkinga ngomhlangano wokukhetha ubuholi obusha besouth African Football Association (Safa) Kwazulu-natal.
Isafa esifundazweni izokhetha ubuholi obusha namuhla ngesonto emoses Mabhida Stadium. Ngaphambi kokukhethwa kobuholi obusha, kuzophasiswa i-statute esisha sesifundazwe njengoba sesizokuba wuhlaka oluzimele.
Inkinga idalwa wukuthi ezinye izifunda zishaya amakhala ngokuhlaliswa kwalo mhlangano.
Bekuvalwa ngolwesine ngo13h00 ukuphakanyiswa kwamagama abaholi abazongenela umjaho wezikhundla.
Bekulindeleke ukuthi isikhundla sikasihlalo sibangwe nguThemba Phiri wasothukela no- Kwenzakwakhe Ngwenya waseMkhanyakude.
Uvelaphi Kubheka ongusihlalo ophumayo, usanda kutshela leli phephandaba ukuthi ngeke alungenele ukhetho lwesifundazwe.
Uthi uzokwamukela ukuphakanyiselwa esigungwini sikazwelonke.
Kuzokhethwa usihlalo namasekela amathathu. Usihlalo nesekela lokuqala bazomela isifundazwe esigungwini sikazwelonke sesafa.
Isekela lokuqala lizosingatha izimali kuthi elesibili libhekane nokusebenza kwehhovisi nezinhlelo kanti elesithathu lizodidiyela imiqhudelwano nokunye.
Ungwenya ukuqinisekisile ukuthi uzokuba yingxenye yomhlangano wanamuhla. Nokho uphiri uthi ngeke alubhade kulo mhlangano ngoba kawukho emthethweni.
“Mina angikwazi ukuba yingxenye yomhlangano wasehlathini. Ngithi owasehlathini ngoba isafa yakubeka kwacaca ukuthi kumele kukhethwe kuma-local Football Association, izifunda, izifundazwe bese kukhethwa ezingeni likazwelonke.
"Izifunda eziningi azikakaqedi ukukhetha ubuholi obusha. Thina nje lapha othukela silindele ukuphakamisa amagama mhla zingama-23 kwephezulu njengokulandisa komthethosisekelo wesafa. Ngizwa ngawe nokuthi umhlangano usemabhida. Angiyi kuwona,” kusho uphiri osanda kubuyiselwa njengomengameli wesafa uthukela Region.
Kuthiwa isafa ethekwini Region ngeke ivunyelwe ukuba yingxenye yomhlangano wanamuhla ngenxa yokukhungathwa yizinkinga. Lesi sifunda sinobuholi obubili njengoba kukhona obukaAlpha Mchunu obuzinze ehoy Park nobukamazwi Mkhize obuseCurries Fountain.
Usimphiwe Xaba obambisene nokubheka ebuholini besifundazwe, ukuqinisekisile ukuthi umhlangano wamanuhla ngesonto uzoqhubeka. Uthi kufikile kubona ukuthi kukhona abanokudideka. Uthi umhla zingama-23 kwephezulu, ngowokuphakamisa amagama abaholi bakazwelonke hhayi besifundazwe. Ukugcizelele ukuthi naye akalungeneli ukhetho lwesifundazwe. Uthi balandele yonke imigudu ukuze bahlalise umhlangano wanamuhla.