ISEXWAYISO ESISHUBILE KUBALANDELI BE-CHIEFS
Kumele balindele imvula yezinyembezi
ISEXWAYISO esishubile kubalandeli bekaizer Chiefs ezobhekana nelamontville Golden Arrows kwinedbank Cup Last 32 namuhla ngesonto ngo-15h30 EFNB Stadium, esoweto.
Unduduzo “Sulumane” Sibiya olihlikihla esiswini kubafana Bes’thende utshele ILANGA langeSonto ukuthi abathandi bechiefs bakwazulu-natal abazohambela lo mdlalo kuzofanele bazihlinzeke ngamaduku nama-tissue okusula izinyembezi uma sebebuyela emakhaya.
“Siyazi ukuthi ngesikhathi bebona beqhathwa nathi bazitshele ukuthi bazodlulela kalula emzuliswaneni olandelayo.
"Engifuna ukubatshela kona wukuthi mabakulindele ukubuya bebhocobele kulolu hambo. Nakanjani bazobuya bephoxekile kulo mdlalo,” kusho usibiya.
Lo mdlali ukhuluma ngalolu hlobo nje, uyazi kahle inselelo ehambisana nokulwela ukukhipha inkunzi esibayeni sayo njengoba ngesizini edlule efane nomumese oshisayo unqamula ebhoteleni kwimamelodi Sundowns eshaya ingcwenga yegoli beyikhipha ngo-1-0 kuma- quarterfinal alo mqhudelwano emdlalweni obusetshwane.
Uqhube ngokuthi bafuna nokunyomfa ikusasa likasteve “Mphathi” Komphela ongumqeqeshi wechiefs.
Ukomphela ungaphansi kwenkulu ingcindezi ukujabulisa abathandi bechiefs osekuphele iminyaka emibili nesigamu bengayazi inkomishi kwezidlalelwa kwipremier Soccer League (PSL).
Ukomphela usesalelwe yi-absa Premiership nenedbank Cup nje kuphela ukuzama ukuqeda indlala yezicoco ezimpofaneni ezivamise ukuzicoboshisela kule kilabhu yakwazulu-natal.
“Ichiefs ivamisile ukuzenzela kithina kodwa kulokhu noma kanjani kuzonqoba thina. Lokho angikungabazi.
"Ukomphela ubhekene nengcindezi yokuyinqoba le nkomishi ngoba uma kungenjalo umsebenzi wakhe usengcupheni. Siyakwazi konke lokho kodwa ngifuna ukukubeka kucace ukuthi kuphelile ngaye nale nkomishi.
“Into esiyiyela kulo mdlalo wukuvikela abaqeqeshi bethu kwazise nathi izinto kazisihambeli kahle.
"Sihlose ukuvuka ngechiefs. Ngeke simzwele nakancane ukomphela kulesi simo abhekene naso. Ixoxo nexoxo umazigxumela,” kusho usibiya.
Usiphiwe “Shabba” Tshabalala odlala esiswini kwichiefs, uthi bazokwenza ngakho konke okusemandleni ukuwunqoba lo mdlalo.
“Siyalwazi usizi esibhekene nalo njengoba ikilabhu kunesikhathi eside inganqobi lutho.
"Ngakho-ke ngeke sikuvumele ukuwashiswa ijezi zisuka nje kulo mqhudelwano.
"Ukuphuma kwethu ekuseni kungadala omkhulu umonakalo. Ngakho-ke kufanele noma kanjani siwunqobe lo mdlalo kumnyama kubomvu,” kusho utshabalala.