Khululeka, uzethembe ku-bra owugqokile
NOMA yimuphi owesifazane cishe angakutshela ukuthi into yokuqala ayenzayo uma efika ekhaya wukukhumula u- bra. Yeyi iyinkinga nansi into!
Phela siyawugqoka singabesifazane ngoba sifuna ukuthi yonke into emzimbeni ihlale endaweni yayo futhi ubukeke kahle kosuke ukugqokile.
Iqiniso lithi ukube iningi lethu liyazenzela ngabe kaliwugqoki nhlobo u- bra. Manje ohhe indalo iyaphoqa. Angithi amabele avele azibhekele eningizimu ngenxa yokushintsha komzimba nokukhula.
Kuyinto engebalekelwe ukuthi labo bra esibathanda kangaka beza nezingqinamba ezisishiya sikhathele. Phakathi kwazo yilezi:
Ukugqoka usayizi okungesiwo owakho: Kuthiwa iningi labesifazane kaliwazi usayizi kabra eliwugqokayo yikho lokhu okwenza lithenge usayizi okungesiwo. Kubalulekile ukuthi uzikale ukuze ungachithi iminyaka ugqokana no- bra okulethela izinhlungu. Umzimba ushintsha njalo ikakhulu uma uke waba nabantwana noma wehlelwa yisisindo somzimba.
Ukuchitheka kwamabele: Uma wake wafikelwa wumuzwa wokuzwa sengathi amabele ayachitheka kusho ukuthi u- bra wakho mncane. Lokhu kuyinto eyejwayelekile engacishe iphazamise usuku lwakho lonke ikakhulu uma ungumuntu onambele athe ukuba makhulu.
Ukugwema lokhu, nyusa inkomishi oyigqokayo mhlawumbe usuke ku-a uye ku-b noma usuke ku-b uye ku-c.
Ukugwazwa yinsimbi ka- bra: Kayikho into enesicefe njengokugwaza yinsimbi ka- bra, ngisho ngabe ukwazi kanjani ukulawula le nkinga kodwa uma ike yajika nje kancane insimbi kusuke sekonakele. Uma unenkinga enjengalena lokhu kusho ukuthi kumele ushintshe u- bra owugqokayo kodwa usebenzise lo ongenayo insimbi.
Ukuwa kwama- strap: Sonke siyazi ukuthi ukulungisa amabhande kuyisidina. Mhlawumbe omunye umuntu angabuka isisombululo sale nkinga kuyinto elula kwazise ngokujwayelekile kuye kusize ukuwaqinisa. Kuthiwa uma uhlaselwa yile nkinga kumele ubheke izinto ezimbili, kunokwenzeka ukuthi unamahlombe amafishane noma agobile yingakho amabhande ehla. Okungasiza wukuthi ushintshe uhlobo luka- bra owugqokayo mhlawumbe usebenzise u- bra oyi- convertible. Uma kungenjalo thola umthungi ozokusondezela amabhande ndawonye.
U- bra okumpintsha ngezansi kwamabele: Uma kungukuthi usuthe ukunonophala noma ukhulelwe, nakanjani u- bra wakho uzokumpintsha. Lokhu kukwenza ungakhululeki usuku lonke kube sengathi amabele ayachitheka ngaphezu kwalokho no- bra nawo usuku unwebeka.
Kasikho-ke isidingo sokuthi ugijimele esitolo esidayisa izinto zangaphansi uyothenga omunye ngoba lokhu kuyalungiseka. Thenga i- bra extender esiza ukuthi u- bra wakho unwebeke, iyatholakala ezitolo ezifana nakowoolworths no-edgars.
U- bra ovelayo kokugqokile: Abanye besifazane uma begqokile kabathandisisi ukuthi izinto zangaphansi zivele, kwesinye isikhathi ukuvela kuka- bra kakulawuleki ngenxa yempahla osuke uyigqokile. Sebenzisa amabra clipper akwazi ukuthi ahlanganise amabhande ngemuva bese kuba sengathi u- bra uyi- race- back.
Uma u- bra ugwaza emahlombe: Ngokujwayelekile uma uzwa u- bra ugwaza emahlombe noma wenyuka ngemuva kuba sengathi uwubelethile uyaye uzitshele ukuthi uqine kakhulu emabhandeni asemahlombe. Kuthiwa kakunjalo u- bra usunwebeke kakhulu noma umkhulu wona uqobo, kumele uthole usayizi omncane. Uzokwazi ukuthi ugqoke u- bra okulinganayo uma ukwazi ukufaka iminwe emibili ngaphansi kwebhande langezansi kwamabele.
U- bra owenza kuputshuke izinyama: Kunohlobo luka- bra olwenza kube sengathi kunezinyama emhlane, mhlawumbe ukhuluphele kakukhulu kanti kakunjalo. Lokhu kusuke kusho ukuthi kumele uxegise u- bra
wakho.
Uma kungenjalo thenga u- bra
okuyiwo nje- smooth/soft shaper
owakhele ukuthi kungabi nezinyama eziputshukayo ngemuva.
Okunye okumele ukuqaphele wukuthi u- bra ugqokwa njalo nokusho ukuthi ugcina sewunwebekile. Lokhu kwenza ukuthi amabele awele ngaphambili bese kuba sengathi u- bra
uwubelethile. Uma uthenga u- bra
omusha bheka ukuthi ngabe umzimba wakho usushintshile yini, mhla-wumbe unciphile noma usukhuluphele noma-ke uma usunomntwana nakanjani amabele azoshintsha .
Ukuze uhlale isikhathi eside mawuwashwe ngezandla. Uma usebenzisa umshini wuvale ezinsimbini ( hooks) bese ubafaka ndawonye (o- bra) esikhwameni ukuze bangalimali, ubomise elangeni.