Osomabhizinisi bakhaliswa ukunqanyulwa kukagesi
Bathi notsotsi bathola intuba yokugqekeza izimoto zabantu ezindaweni zobumnandi
BAKHALA izinyembezi osomabhizinisi ngohlelo lwe-eskom, lokucishwa kukagesi ngezikhathi ezithile ( load shedding), bathi lesi simo silimaza amabhizinisi abo.
Abakhulume NELANGA Langesonto izolo, bathi abalwazi uhlelo oluqondile lokuthi uzocima nini, okubenza bangakwazi ukuzilungiselela.
Njengamanje i- load shedding iyaqhubeka ezweni lonke. Ngolwesihlanu izindawo ezahlukene ezweni zibhekane nenkinga yokunqamuka kwamandla kagesi. Ngawo ulwesihlanu, ezindaweni ezidumile zobumnandi ethekwini kucishe izibani ngesikhathi kusaqhubeka imicimbi.
Ezinye zezindawo zenjabulo ezithintekile yilapho bekusakazwa khona bukhoma uhlelo lukarobert Marawa, emax’s Lifestyle emlazi, nase-artizen Lounge, Kwamashu udladla Mshunqisi lapho ebegubha khona usuku lwakhe lokuzalwa.
Ngesikhathi ugesi unqamuka kulezi zindawo, bezisaphenduka, abantu bezithokozisa, kodwa basala bekhexile sekumnyama. Umnu Max Mqadi, ongumnikazi wemax’s Lifestyle, uthi ubonga ukuba ne- generator njengoba ehlelwe yilesi simo kusakazwa bukhoma uhlelo lukarobert, kwimetro FM nakwiradio 2000.
“Inzima kakhulu le nto ikakhulukazi uma kuyimpelasonto. Kunzima ukuletha abantu elokishini kanti uma kutholakala into encane nje eyiphutha, ivele ibe nkulu ngoba yiselokishini.
"Notsotsi bathola intuba ngoba ubumnyama buyabasebenzela bese begqekeza nezimoto zabantu abasuke besivakashele.
"Okubuhlungu wukuthi laba bantu abasuke bevakashile, ngeke ukwazi ukubabuyisa uma sebehambile. Nakuba nginayo i- generator, kodwa inkinga wukuthi kusuke kumnyama komakhelwane bese siba nezinkinga,” kuchaza umqadi.
Umnu Simphiwe Mcayiyana, wase-artizen Lounge, uthi: “Siyahlukumezeka kakhulu. Sithethisana nabantu bemicimbi, nezethameli zifuna ukubuyiselwa imali yazo. Nabasuke bethi bazovakasha bafika bajike ngoba bebona kumnyama, kanti nasekudleni siyalahlekelwa kakhulu ngoba (ukudla) kugcina kungasekho esimeni esifanele.
"Ama- generator ayabiza ngakho u-eskom kumele ubambisane nathi ukusilekelela njengoba sigcina siba nenkinga yokonakalelwa yizinto,” kubalisa yena.
Udikatso Mothae, oyisekela likakhulu Phasiwe, okhulumela u-eskom, uthe kumele abantu bazihluphe ngokuzokwenzeka kuze kushaye okungenani umarch wonyaka ozayo.
“Emasontweni amabili edlule umnu Phakamani Hadebe, oyiGroup Chief Executive, uyichazile inkinga u-eskom abhekene nayo.
" Osomabhizinisi kumele bakhulume nomasipala wabo, wonke umuntu angakwazi ukuzibheka ukuthi uzothinteka kanjani ngokungena kwi- website yethu ethi www.eskom.co.za noma afonele ku-086 003 7566,” kusho udikatso. zowakha@ilanganews.co.za
Abasuke beze emicimbini yethu bafuna imali yabo uma ugesi usuthe 'laphe'.