Uyathanda ukuphekela abantu abadala
MVAMISA abantu abasha abaphumelele empilweni bayazithanda izinto eziwubukhazikhazi ikakhulukazi izimoto zakwanokusho kodwa udladla Mshunqisi uthi akanandaba nalokho yena. Lo mculi ogama lakhe ngu-anele Dladla, oshisa izikhotha kulezi zinsuku, owazakhela udumo ngonyaka owedlule ngezingoma ezahlukene okubalwa kuzona esihloko sithi “Memeza” kanye nesihloko sithi “Omunye” eyahlukanisa unyaka emisakazweni eyahlukene yaphinda yaba yingoma yonyaka kumaSAMA, uthi imoto iyinto yokugcina ayicabangayo empilweni yakhe.
Uthi uyazi ukuthi isikhathi sakhe sokuhanjelwa kahle yizinto sizodlula, ngakho ukholelwa ekubeni uma ethola imali enze izinto ezisemqoka ezizoqhubeka zimngenisele imali. “Sekukaningi abaphathi bami bengincenga ukuba ngithole imoto enesithunzi kodwa ngithi sengihlelile ukuthi ngizoyithenga kuvele kufike umcabango wokuthi angenze into ezokwazi ukungiphilisa noma ngingasekho emculweni,” kusho yena.
Udladla uthi ukuba kuya ngaye ngabe bonke abaculi bayafundiseka ngokuthi izikhathi ziyafika zedlule - okungukuthi namhlanje izinto zikuhambela kahle kodwa kusasa kujike ukwenza. “Uyabona nje manje njengoba abantu bengezwa lutho ngodladla mhlawumbe ngonyaka ozayo bazobe sebezwa omunye umuntu. Lokho-ke akumele kungenze ngibe nenhliziyo ebuhlungu. Kumele ngimbongele futhi ngimeseke lowo muntu osuke esethandwa ngaleso sikhathi,” kusho yena. Ukhuluma kanjena nje ungomunye wabaculi ababhekiwe ukuthi bangase basifake kunyaka ka-2019 ngengoma yakhe esihloko sithi "Amalukuluku" ekwialbhamu yakhe esihloko sithi Umshunqo. Uthi indlela edayisa ngayo le albhamu iyammangaza njengoba ithengiswa okwamagwinya ashisayo nje.
“Yicwecwe lami lokuqala leli kodwa indlela elithengwa ngayo iyangijabulisa kakhulu,” esho.
UNAMATEKISI ATHUTHA UMPHAKATHI
Kule albhamu usebenze nodj Tira, umadanon, uprofessor, idistruction Boyz, utipcee nabanye. Udladla phambilini kwake kwavela ukuthi uzalwa yinjinga engusomatekisi odume ngozeze elokishini Kwamashu.
Naye udladla Mshunqisi uthi ulandela ezinyathelweni zikayise njengoba esenawakhe amatekisi athutha umphakathi. Akathandanga nokho ukuphumela obala ngokuthi mangaki lawo matekisi. Ukuba nalawa matekisi uthi uyazi ukuthi kuzomsiza eminyakeni eminingi ezayo.
Ngaphandle komculo, amatekisi, nenkampani yokupheka, udladla ubuye asebenzisane nenhlangano yabantu abadala ebizwa ngokuthi Isibongile Senior Citizens, Kwamashu.
Ngolwesithathu ubenze isiphihli sedili lomcimbi wakhe wokuzalwa walugubha nabantu abadala, ebaphekele wabapha nezipho. Uthi ukuphekela abantu abadala wakuqala engakadumi.
“Isikhathi esiningi ngisichitha nabo abantu abadala ngoba uma nginabo ngiyabusiseka,” kusho yena. Nakuba abantu abaningi ikakhulukazi kwezikaqedisizungu bemazi ngokuthi ungudladla Mshunqisi kodwa ngakubo ubizwa ngoneh.
AKAZITHWELE UDLADLA
Uma umbona ngakubo ngezinsuku ezejwayelekile ngeke umnake ukuthi nguye ngempela ngoba uziphilela impilo ejwayelekile. Uke umthole egadula ngezinyawo ezitaladini zakwamashu.
Uyabonakala ukuthi akazithwele futhi akakufakile ekhanda ukuthi udumile, ungusaziwayo. NgoLwesihlanu ubenze omunye umcimbi wokugubha usuku lwakhe lokuzalwa, nokwethulwa kwecwecwe lakhe elisha.
Kulo mcimbi bekuboshelwe amaciko amaningi asebenzisana nawo okubalwa kuwona utipcee, Distruction Boyz, DJ Tira nabanye. Ngawo ulwesihlanu emini wethule i- video yengoma yakhe esihloko sithi “Cothoza”.
Kuneqembu labadansi abancane elingaphansi kwakhe elizibiza ngomshunqo Team, elibophele ududu
Kubheka, unomfundo
Sikhosana nosma Maphumulo.
“Lezi yizona zingane zami engichitha isikhathi esiningi nazo njengoba zingidansela nje,” kusho yena.