Izimo ezikwehlela empilweni azingashabalalisi iphupho
UMLOBI wencwadi esiyethula kubafundi namuhla, yinsizwa esencane ebizo layo ngumfundo Shozi wasemlazi.
Yincwadi lena egcwele amazwi ahlakaniphile kuwona wonke amakhasi ayo, kusukela ekhasini lokuqala kuze kube sekugcineni. Amanye kulawo mazwi akhethe ukuba endlalele ngawo wonke umsebenzi wakhe, ngolukakhwini, athi: “In life when something happens to you, you have two choices, you either allow to make you better or you let it make you bitter”.
Ngamanye amazwi umlobi uthi uma wehlelwa ngokuthile empilweni yakho, kubili ongakhetha phakathi kwakho, wukuba ukuvumele kukwenze umuntu ongcono noma ukuyekele kukwenze ube nenzondo.
Umlobi akavelanga nje wazenza usiyazi ngokuhlanganisa lo msebenzi oqukethe amazwi okuhlakanipha amaningi, kepha wazi ngaye ngenxa yesimo esibuhlungu esamehlela eselibhungwana elabe linamaphupho ngekusasa eliqhakazile emdlalweni webhola.
Konke lokho kwaphela kalula engozini yemoto eyamehlela ekhaya kubo neyaphetha ngokuba anqunywe umlenze wakwesokudla.
Esithombeni esihambisana nalawa mazwi ashiwo ngenhla, umfundo umi ngesibindi nokuzethemba ngokusebenzisa isithombe ewubambile umlenze wakhe wokufakelwa.
Umfundo manje usengumlobi othola imiklomelo nobuye abe ngumethuli wezinkulumo ezakhayo eqophelweni lamazwe ngamazwe lapho egiya ededelana khona nabantu abanjengo JT Foxx, umnu Patrice Motsepe ongusozigidi, ujenna Clifford, uhugh Hilton nabanye. Uzalwe wakhulela emlazi. Ukhuliswe ngumzali oyedwa, uyise washona eneminyaka eyisi-8 kuphela. Asenele lapha isikhala sokusho konke ngaye.