Ukuhlukunyezwa kwenziwa nangesisondelene nabo
Kokunye uba sothandweni nomuntu okuhlukumezayo uzitshele ukuthi usazoshintsha
abangekho emshadweni.
Kokunye ngakho ukuhamba ingqubuleka iziphonsa yonke indawo, uzoyithola isiyondla nezingane okungesizona ezayo - yazi noma ingazi. Uma imali ingaxhashazwanga ngale ndlela, iphelela etshwaleni nakoshisanyama kodwa ekhaya kube kulanjiwe.
UTHANDO OLWEQILE
Obunye ubudlelwano bothando buke buhambisane nesikhwele esinokusangana phakathi lapho owesifazane ephelelwa yinkululeko ayenayo kubo lapho ezalwa khona. Indoda lena izomenza afane nesiboshwa esihlala sivalelwe.
Akasezukuvunyelwa ngisho nokukhulumisa omunye umuntu wesilisa. Abangani bakhe sekumele ahlukane nabo ngisho bengesibona abangani ababi.
Le nto yothando olunje kokunye isuke kade iqale kungakashadwa, kodwa ngenxa yokuzikhohlisa kowesifazane ezithembisa ukuthi izinto zingase zibe ngcono ngokuhamba kwesikhathi, aze agcine engenile emshadweni nomuntu onjalo.
UKUNUKUBEZA
Sekukhona izenzo ezishaqisayo esezenzeka kule mihla lapho indoda ilala nabantabayo besebancane, kokunye bengakazi nokuthi yini eyenziwayo kubona. Kuthi nalapho indaba isize yaputshuka bese owesifazane azithole sekufanele afele phakathi ngoba ethi uzama ukuhlenga umendo wakhe.
Ngisho angathula, iqiniso lithi usuke ephansi kokukhulu ukuhlukumezeka emoyeni.
UKUNUKWA NGOKUTHAKATHA
Kukhona nale ntimbothi yokuthi owesifazane ungumthakathi obulala umndeni womyeni wakhe. Kuba nzima-ke uma lowo wesi- fazane esekhulile ngeminyaka njengoba kuye kuvele emibikweni yezindaba ukubulawa kwezaguga okuthiwa zisolwa ngokuthakatha.
UKUQWASHISA
Njengoba sekushiwo ukuthi lesi sikhathi sezinsuku ezili-16 zokukhuza izenzo zodlame olubhekiswe kwabesifazane nabantwana, siwumbono omuhle, nokho lokhu bekungafanele kube yindaba ekhulunywa ngalezi zinsuku kuphela.
Empeleni kumele ngabe abasemagunyeni banezinhlelo eziqhutshwa unyaka wonke bese kuthi ngalezi zinsuku kube yithuba lokubheka ukuthi yini efeziwe kusukela ngesikhathi esifanayo ngonyaka odlulile.
Siyezwa kuthiwa uhulumeni unohlelo lokuvuselelwa kwezimilo nokho esingezwa lutho ngalo, ukuthi lwabelwe inkece engakanani futhi esetshenziswa kanjani, nokuthi yikuphi okuba ngumongo wonyaka nonyaka phansi kwalolo hlelo.
Asazi-ke noma nangonyaka ozayo sizobe sisakhuluma kanjena noma kuyobe sekukhona ubungcono.