Uthole amadlelo aluhlaza uzimdollar
Uzolingisa emdlalweni kamabonakude
UPHINDE wanyelwa yinyoni esandleni umsakazi wokhozi FM, uzimiphi “Zimdollar” Biyela njengoba kuvela ezithi usethole umsebenzi wokulingisa indawo eqavile emdlalweni omusha kamabonakude, ozosakazwa esiteshini esikhokhelwayo, umzansi Magic channel 161.
ILANGA Langesonto lithole ukuthi uzimdollar useqalile ukuqopha iziqephu zalo mdlalo osihloko sithi Ehostela, ozodlala ngamasonto kusukela ngo-8 kuya ku-9 kusihlwa. Lo mdlalo okuthiwa uyitelenovela, kulindeleke ukuba uboniswe ngonyaka ozayo.
Leli phephandaba like layibhadama le ntokazi yehla ekhumbini okukholakala ukuthi ithutha abalingisi balo mdlalo ibayisa noma ibasusa lapho kuqoshelwa khona Kwamashu.
Umthombo osondelene kakhulu nezenzeka ngaphakathi kulo mdlalo, utshele leli phephandaba ukuthi ngokwalo mdlalo, uzimdollar uzobe engufortunate Sikhosana ogane indoda ebihlala ehostela, kodwa asehlala nayo elokishini. Le ndoda ngokusho komthombo iyafihla enkosikazini yayo (Zimdollar) ukuthi isayiphila impilo yasehostela.
Ufortunate uze athole indoda isishonile ukuthi kanti ibisaqhubeka nempilo yasehostela. Lo mdlalo kuthiwa uqoshelwa ehostela isulabasha khona Kwamashu, kanti ingqikithi yawo wukuveza impilo yasehostela nokuxhumana phakathi kwabantu bakhona nabasemalokishini.
Khuzokhumbuleka ukuthi le ntokazi iyabonakala nasemdlalweni owuchungechunge, uzalo okhonjiswa KUSABC 1 kusukela ngomsombuluko kuya kulwesihlanu kusihlwa.
Ethintwa yileli phephandaba uzimdollar, akaphikanga futhi akavumanga. Ucele ukuba kuthintwe abakwastained Glass, okuyinkampini epheka lo mdlalo.
Bagcine bengaphawulanga abestained Glass ngemuva kokuthintwa kwaze kwashaya isikhathi sokushicilela.