INJABULO USUTHU LUSUKA EZEMBENI
Umqeqeshi uxwayise abadlali ngokuxegisa amatomu
UXWAYISA abadlali bakhe umqeqeshi wamazulu FC agila izimanga emidlalweni ye-absa Premiership kulezi zinsuku.
Usuthu luguqise ngo-1-0 ichippa United kowe-absa Premiership ngolwesihlanu kusihlwa enelson Mandela Bay Stadium, ebhayi.
Igoli okunqobe ngalo usuthu lishaywe ngubutholezwe Ncube ngomzuzu ka-42.
Usuthu lunqoba lo mdlalo nje, ngolwesibili luguqise ngo-2-1 ihighlands Park emakhulong Stadium, etembisa.
Luye kule midlalo lubambe ibhuleki emsileni we- log. Nokho seluxaxambili njengoba selubalekile ezembeni.
Luye kule midlalo lunganikwa lutho kwazise belungakaze lunqobe mdlalo ekuhambeni.
Ucavin Johnson ololonga usuthu uxwayisa abadlali bakhe njengoba ekholwa wukuthi kusekukhulu okusafanele bakwenze.
“Sisukile kule ndawo embi ebesihleli kuyona kodwa lokho akusho ukuthi kufanele sijabule bese sikhohlwa wumsebenzi okusafanele siwenze.
"Ngiyajabula ngoba sinqobe le midlalo ekuhambeni kodwa kusafanele sisebenze okwamanje angikagculiseki ngendawo esikuyona, sisengenza kangcono,” kusho ujohnson.
Lo mqeqeshi ubethembise abalandeli ukuthi noma kanjani kuzoyiwa emaholidini kakhisimusi leli qembu selisukile emngceleni wezembe.
“Ngiyakholelwa kubadlali bami namanje ngisamile ekutheni sizoqeda isizini sikwi- top 8.
"Kodwa-ke asifuni ukugagamela, sizobhekana nomdlalo ngamunye.
"Kuningi okusafanele sikulungise njengokuhlohla amagoli.
"Kulo mdlalo wechippa bekufanele sinqobe ngenqwaba yamagoli kodwa sangawasebenzisa amathuba esiwatholile. Kusafanele siyilungise lento ngoba ngelinye ilanga izosifaka enkingeni,” kusho ujohnson.
U-eric Tinkler ocija ichippa olengelwa yizembe uthi bekufanele bahlulwe kulo mdlalo.
“Selokhu ngafika kule kilabhu besiqala ukudlala ibhola elibheda ngalolu hlobo.
"Amazulu abengcono kunathi, lo mdlalo awunqobe ngesiwombe sokuqala.
"Abenqoba yonke into thina singenzi lutho.
"Kodwa-ke sizozama ukulungisa izinto kodwa ngeke ngikufihle ukuthi ngiphoxekile,” kusho utinkler.
Lo mqeqeshi kuvela ukuthi ubizelwe emhlanganweni oyisipesheli ozokuba kusasa ngomsombuluko okuyilapho kuthiwa kufanele azobeka izizathu kusihlalo wale kilabhu usiviwe “Chippa” Mpengesi ukuthi kungani le kilabhu kusafanele imgcine.
Abasondelene nompengesi bathi lesi sikhulu sesiqalile ukuthungatha umqeqeshi njengoba sinovalo lokuthi ikilabhu yaso izophinde igencwe yizembe.