Kumiswe izinkonzo ebandleni lodumo
ZIMISIWE izinkonzo ebandleni lomfundisi wodumo, upastor Shepherd Bhushiri, epretoria, njengoba kuqhubeka uphenyo ngesigameko sakamuva esiphinde samfakela amehlo lo mfundisi ovele esematheni ngezigigaba ezingezinhle.
Ukumiswa kwezinkonzo kuleli bandla elibizwa nge-enlightened Christian Gathering (ECG), elikhonzela etshwane Events Centre, epretoria, kumenyezelwe yibona abaholi balo.
Ngenyanga edlule kuleli bandla kushone abesifazane abathathu ngemuva kwesibhudubhudu okubikwa ukuthi sisuke ngesikhathi abantu bebalekela imvula enamandla nokuduma kwezulu, bethi bayongena ngaphakathi endlini yesonto. Ngaphandle kwalaba abashona, kwaphinde kwalimala nenqwaba yabanye abantu.
Leli bandla lithe limise izinkonzo ukuze lizilele labo abashona, lathi izinkonzo ziyoze ziqale ngasekupheleni kwale nyanga.
I-city of Tshwane inikeze leli bandla izinsuku ezingu-30 ukuba lilungise izinto ezithile ezimayelana nezokuphepha okutholakale ukuthi kazikho esimeni esifanele futhi kazihambelani nemithetho ebekiwe.