UTHEMBISA LUKHULU OJOYINA IMBEWU
ITHEMBISA lukhulu ngendawo ezoyilingisa kwimbewu: The Seed intandokazi yomlingisi esanda kumenyezelwa ngokujoyina lo mdlalo owuchungechunge okhonjiswa kwi-e.tv phakathi nezinsuku. Umelusi Yeni ozakhele udumo emidlalweni kamabonakude eyahlukene uthi indawo kamanqoba azoyilingisa izobachaza kakhulu ababukeli. “Engingakusho wukuthi abantu bazochazeka ngaye futhi uzoba sezinhliziyweni zabaningi,” kusho umelusi osekunesikhathi engabonwa nangalukhalo kumabonakude. Echaza kafushane ngomanqoba uthi uzofika ezophenya ngenkohlakalo eqhubeka emaluju bese ethola uthando. Akafunanga nokho ukwanda ngemininingwane. Uthi ukujoyina lo mdlalo kufana nokufezeka kwephupho leminyaka.
“Uma ukhumbula ngesikhathi esiqale ngaso ukulingisa besiphoqeleka ukuba size siye egoli ukuze sithole imisebenzi. Kuyajabulisa ukuba khona kwemidlalo Uzalo nembewu ezinze ethekwini ngoba sesiyakwazi ukusebenzela ngasekhaya okuyinto ebihlezi iyisifiso sami,” kusho lo mlingisi ongowaKwamashu.
Uthi kule minyaka ekulo mkhakha kuningi okuhle nokubi okwenzekile kodwa kukho konke ukwazile ukuthola izifundo.
Umelusi obesegxile kakhulu emkhankasweni womnyango wezeMpilo Kwazulu-natal, wokukhuthaza abesilisa ukuba basokwe, uvumile ukuthi akekho msulwa njengoba ewenzile amaphutha emsebenzini wakhe wokulingisa kodwa lokho kumkhulisile. Kuzokhumbuleka ukuthi kuningi okuke kwabikwa ngalo mlingisi ngemuva kokunyamalala kwakhe kwezikamabonakude. Kuke kwabikwa nokuthi izinto ziyambhedela futhi usedlelwe nezimpahla zakhe ezibizayo.
Ekhuluma naleli phephandaba uthe akafuni ukugxila kokubi okubikwe ngaye kodwa ufuna ukubheka okuhle.
“Akusiwona umdlalo ukuthi sengibe kulo mkhakha iminyaka engu-20 ngakho okubalulekile manje wukuba sicobelele abeza ngemuva kwethu ngolwazi,” esho.
Uthi asezimisele ngokugxila kukhona manje wukuthuthukisa intsha kwezokulingisa lo mkhakha wezikaqedisizungu.
Umelusi useke wabonakala emidlalweni kamabonakude okubalwa kuyo igenerations, Sokhulu and Partners, Rhythm City, Muvhango, Mdiba: The Series neminye.