BAZITHATHELA NGO'DLI' INDAWO KAMASIPALA
AMALUNGU omphakathi waselamontville, ethekwini akhala ngokugqoza kohlelo lokulethelwa izindlu zomxhaso kahulumeni angenele ngo'dli' umhlaba kamasipala wetheku, osesilverglen, ngasechatsworth, awushaqa, athi aseyazakhela izindlu kuwona.
La malungu omphakathi abedinwe egane unwabu izolo ngomgqibelo, avuke ekuseni athatha amathuluzi ayomba kulo mhlaba, ahlukaniselana iziza.
Akhala ngokuthi sekunesikhathi eside elindele imixhaso, kodwa awayitholi.
Elinye ilungu elingathandanga kudalulwe igama lalo, lithe selihlale iminyaka lilindele uxhaso lukahulumeni, kodwa alufiki.
Lo mphakathi umba iziza nje, amaphoyisa kamasipala abekhona kodwa awazange awulwise.
Umnu Mthunzi Gumede okhulumela imeya yetheku, unkk Zandile Gumede, uthe basigxeka kakhulu isenzo sabantu abadla umhlaba ngo'dli' ngenhloso yokwakha.
“Uma abantu bezithathela emhlabeni kamasipala, babambezela intuthuko, kanti kunezindawo okungamele kususwe imvelo kuzona ukuze uma kufika izikhukhula ikwazi ukuvikeleka.
"Manje abantu bavele babone ihlathi, balingenele,” kusho umnu Gumede. Uthi bazothumela ithimba elenza lo msebenzi ukuba bayosuswa laba bantu abazitapela emhlabeni kamasipala. makhoba@ilanganews.co.za