Ubuyela kumabonakude usophie
Abanye bathi ugugile ukuphatha uhlelo
UBIZWE ngesigogwana abanye bemhalalisela umlingisi ophinde abe ngusomabhizinisi, usophie Lichaba (Ndaba)
( osesithombeni), emuva kokumemezela ukuthi useyehluleka wukuzibamba ngenxa yenjabulo njengoba eqokwe njengomethuli wohlelo lukamabonakude, oluyitalk show, ihashtag, oludingida izindaba ezithinta intsha ebizwa nge- millenials.
Yize bekukhona abamhalaliselayo kwazise bese kunesikhathi engabonakali kumabonakude, kodwa kunabangayizwa nhlobo indaba yokuqokwa kwakhe ekubeni ngumethuli walolu hlelo ngenxa yeminyaka yakhe yobudala njengoba ena-47.
“Umuntu ongangaye ulwethula kanjani uhlelo lwentsha?” kubuza umlandeli utau Sebata.
Kukhona nabebembongisa nokuthi usewumqemane emuva kokusabalala ezinkundleni zokuxhumana kwesithombe sakhe lapho ayebonakala ehle khona kakhulu emzimbeni, okwaphoqa ukuba agcine ekuvezile ukuthi uphila nesifo sikashukela, i- diabetes type 2.
Lo mlingisi uthe useyehluleka wukuhlala nale mfihlo yalolu hlelo azolwethula ngokubambisana nozakwabo abathathu, umantsoe Pout, ufrancois Louw nojarred Doyle.
Ujuvais Dunn, oyi-executive Producer, uthe ihashtag izodingida izindaba ezithinta inhlalonhle nosikompilo lwentsha ebizwa ngama- millenia (ezalwe phakathi kuka-1981-1996).
“Siyethule emuva kokuqaphela indlala yezinhlelo ezidingida okuqondene ngqo nale ntsha. Sibe sesibona isidingo sokuba nalolu hlelo-ngxoxo ukuze izwi lentsha nebhekene nakho kukwazi ukusabalala umhlaba wonke, kungagcini kuyinto ebadla bodwa," kusho yena.”
Uthi bacabange kanzulu ngabazophatha lolu hlelo, kanti okubachaza kakhulu ngabo wukuthi bonke bazoletha umsoco nesinongo esehlukile kwesomunye.
Ihashtag izoqala ukubonakala kumabonakude ngomhla ka-2 kundasa (March) kwi-e-extra ekhonjiswa kuchannel 105 kwi-openview nakwichannel 195 kwidstv. ayandab@ ilanganews.co.za