Kukhunjulwe umsunguli webandla
INCWADI kumaheberu 13 ivesi lesi-7 ifundeka kanje: "Bakhumbuleni ababenihola bekhuluma izwi likankulunkulu kini, niqonda ukuphela kokuhamba kwabo, nilingise ukukholwa kwabo."
Lawa ngamazwi afundwe emcimbini omkhulu wokukhumbula umsunguli webandla ireformed St. John’s Apostolic Faith Mission (echibini) ongasekho u-archbishop Caiphus Giliyase Madwe owaba yisambane esamba umgodi sangawulala ngo-1988.
U-archbishop Madwe abamaziyo babembiza ngelenkunzemnyama engalali endleleni, ngendlela owayelukhuthalele ngayo ukholo eseduze nomsunguli webandla, ist John’s Apostolic Faith Mission, u-archbishop Petros Masango.
Emuva kokuhamba emhlabeni kukabab’ umasango, ibandla lakhula, abefundisi bakhe baqhibuka njengamakhowe besabalalisa ivangeli lasechibini.
U-archbishop Madwe owayeyisifundiswa esinophondo ekhanda efundisa enyuvesi yasezululand, Ongoye, wasungula ibandla lakhe ireformed emzini wakhe, kwa-d 1528 Kwamashu mhla ka-3 kuntulikazi (July 1988), laba nedumela kuphulukiswa abagulayo.
Waduma kakhulu ngokuphilisa abagula ngengqondo. Akuphelanga sikhathi esingakanani, wedlula emhlabeni ngengozi yemoto mhla ka-9 kumandulo (September) 1988.
Umcimbi wangomgqibelo uyisinqumo esathathwa yibandla lonke sokuthi njalo nje esontweni lesibili kunhlolanja (February), kuzokhunjulwa imisebenzi yalo mholi nabanye ayebambisene nabo emsebenzini kankulunkulu.
Bekuhlangene izihlwele zamalunga aleli bandla eselinamadayosisi ayisikhombisa namagatsha akuleli nasemazweni angomakhelwane. Kuqale ngenkonzo yasekuseni ejwayelekile yokuphuza amanzi, kwabuthana amabhendi eselungiselela ukuqala kwenkonzo ngehora le-10 ekuseni.
Amabhendi enze adume ngakho engenisa abaholi nezihambeli endlini yesonto, kusho amacilongo nokhehlegume. Ibe isiqala inkonzo lapho umnu Nhlanhla Madwe, ongumzukulu, emukele khona zonke izihambeli kubalwa nabebevela ekomkhulu lebandla lamast John’s, egermiston.
Kube sekuba nenkonzo yomnikelo maqede kwethulwa ubufakazi, abazalwane bebonga izibusiso abazizuze kuleli bandla. Kusukume uqweqwe oludala olwakhula naye u-archbishop Madwe, umbhishobhi B.J Jiyane owethule umlando webandla bathokoza abazalwane.
Kube sekushaywa ihele kuyiwa emathuneni eredhill, ethekwini lapho kulele khona iqhawe labo, u-archbishop Madwe nomama Lady Archbishop Gladys Sana (umamthombeni) Madwe.
Kufikwe lapho kwakhulekwa umkhuleko omkhulu, "ubabawethu osezulwini", kwabusiswa ithuna maqede kwabekwa izipho okuyinqubo yakhona.
Amabhendi abekhona lapho afuthe kwema izimoto ebezidlula abantu bexakwe ukuthi kwenzekani.
UMLANDO OMFUSHANE WEBANDLA IREFORMED:
Ulady Archbishop Madwe uhole ibandla kusukela ngo-1988 kuya ku-1997.
U-archbishop Isaac Jabulani Ngcobo uthathe kusukela ngo-1997 kwaze kwaba ngu-2015.
Kulandele u-archbishop Mhlupheki Amos Zuma kusukela ngo-2016 kuya ku-2017.
Njengamanje ibandla liholwa ngu-archbishop Robert Mbotho nokunguye obehola lonke uhlelo ngomgqibelo.
Umcimbi uphele ngesonto wavalwa ngenkonzo yasechibini. knowledge.simelane@ilanganews. co.za