UZONGO UVUMBUKE EJIMINI YE-PMB UNITED
UVUMBUKE kwimaritzburg United umasibusane Zongo osezakhele udumo ebholeni lakuleli ngokuba yinkathazo ngaphandle kwenkundla yize enekhono elibabazekayo lokukhulumisa ibhola.
ILANGA Langesonto lithole ukuthi sekubambe isinqumo sika-eric Tinkler ngalo mdlali ogcine ukudlala elihlikihla kwiroyal Eagles. Omunye umdlali ozama ukuheha iso likatinkler nguthami Sangweni ochithwe yichippa United ngokuqala kwalo nyaka.
Kuthiwa bobabili laba badlali bakhombisa ukuzinikela ejimini selokhu benikwe ithuba lokujima nekilabhu.
“Yize kunzima kutinkler ngenxa yendawo ezakhe ezikuyona kwi- log kodwa kumqinisa idolo ukubona abadlali bemulwela enkundleni njengoba besanda kunqoba ipolokwane City ngo-3-1 koweligi emgungundlovu. Ngikholwa wukuthi bobabili bangakwazi ukusayina kule kilabhu yinqobo nje uma bezokwazi ukwehlisa abakudingayo uma kuphela inyanga.
“Phela kasikho isikhulu sekilabhu yebhola esithanda ukuzifaka embazweni ekubeni ikusasa lekilabhu lingacacile. Bayavutha ejimini futhi bayabonakala ukuthi bafuna ukubuyisa isithunzi sabo,” kusho umthombo.
Uquintin Jettoo oyimenenja kwiteam Of Choice, utshele ILANGA Langesonto ukuthi laba badlali basekhona ejimini, kodwa isinqumo kasikathathwa ngabo. Uthi uma sekuphothuliwe bazokwenza isimemezelo.
mfanafuthin@ilanganews.co.za