ISIKHALA:
BUKEKA eyihlabe esikhonkosini uchristopher Katongo ngenkinga yokuntuleka kwabagadli emazweni angaphansi kwesouthern African Development Community (Sadec). Ukatongo ubehambele ukwethulwa kwecastle 5s ngomsombuluko.
Ukatongo wasezambia, uphumele obala ngokuthi inkinga yokuntuleka kwabagadli kakuyona eyaseningizimu Afrika kuphela, kodwa igubuzele wonke amazwe awu-16 ase-afrika eseningizimu.
Sihle impela isiphakamiso sakhe sokuthi indlela eyisiqalo sokubhekana ngqo nale nkinga, wukulandela uhlelo olusungulwe yi-orlando Pirates lokuqasha umqeqeshi ozobhekana ngqo nabagadli njengoba kukhona abacija onozinti.
Cishe nokusungulwa kwesikhungo sabagadli kuphela kungawenza umehluko kule nkinga. Siwuncoma kakhulu nombono kafarook Abrahams wokusungula isikhungo sonozinti bodwa ewestern Cape.
Nxa kungaba khona nesikhungo sabagadli, cishe ngeke silokhu siphenduka inhlekisa emazweni asentshonalanga ye-afrika. Kunzima ukulindela ukubona ikilabhu eqeqeshwa ngumuntu obengunozinti nobedlala emuva ihlohla amagoli.
Ikilabhu eqeqeshwa ngumuntu obengalibheki ipali, kayivamile ukuveza izinyo phambi kwepali. Isibonelo esilula nje salokhu, yindlela icape Town City elivakashela ngakhona ipali.
Le kilabhu ilolongwa ngubenni Mccarthy ozakhele udumo ngokubhakuzisa inethi emazweni ehlukene. Kunabaqeqeshi abaningi abebehluleka ukusebenzisa usiphelele Mthembu ongumgadli ohamba phambili ngokuhlohla amagoli kwicity.
Ubenni njengomuntu obengumgadli kwayena, usemvusile lo mgadli. Ukatongo ohlonishwayo kunobhutshuzwayo wase-afrika, uphinde wathi okunye okwandisa inkinga yokuntuleka kwabagadli, yindlela ujomo Sono asesebenza ngayo.
Usono ubevamise ukuyozingela ulozolo lwabagadli emazweni ase-afrika abapholishe bese ebadedela, kubalwa naye ukatongo ozakhele udumo kuleli ngokuhamba isizini iphakathi, kodwa wabuya wazolanda umklomelo wokuba ngumgadli ovalele amagoli amaningi.
Naye uthi lesi simo besikhombisa ukuthi kunenkinga yokuntuleka kwabagadli e-afrika eseningizimu.
Mhlawumbe nxa usono engabuyela ezimpandeni zakhe, avundulule abagadli njengoba ebenza phambilini, ingaxazululeka kancane le nkinga.
Singaziqhenya ngokuthi ipremier Soccer League (PSL) ibalwa namaligi ayishumi ahamba phambili emhlabeni. Lokhu kakusizi ngalutho ngoba kakubonakali enkundleni.
Iligi iphezulu ngokuba nemali, kodwa izinga lebhola liphansi kakhulu kuyona. Lokhu kufakazelwa nawukuthi iyahluleka ukukhiqizela ibafana Bafana abagadli bezinga eliphezulu.
Kumanje ibafana isengcupheni yokungalubhadi kwi-africa Cup of Nations ezokuba kulo nyaka e-egypt. Indlela yebafana ebheke kwi-afcon incike ekutheni igweme ukwehlulwa yilibya emdlalweni wokugcina wokuhlunga ozokuba ngenyanga ezayo ekuhambeni.
Kunamakilabhu asedlale imidlalo engu-20 kwi-absa Premiership, kodwa abadlali abahamba phambili ngokuhlohla amagoli okungumwape Musonda weblack Leopards notshegofatso Mabaso webloemfontein Celtic, bana-wu-8 nje kuphela.
Lokhu-ke kusidweba sigqame isithombe sokuthi bayindlala abagadli abazohamba ezinyathelweni zezingwazi ezifana nofani Madida.
philanin@ilanganews.co.za