BAZONEKELWA UMPHAKATHI ABANGAZIHLONIPHI IZISEBENZI
BASENGCUPHENI yokunekwa kwamagama abo emphakathini abaqashi abangahambisani nomyalelo kahulumeni wemali okumele iholwe emazingeni aphansi, ngokusho kukangqongqoshe wezaBasebenzi, unkk Mildred Oliphant.
Lo myalelo uqale ukusebenza ekuqaleni kwalo nyaka, nalapho ucacisa ukuthi izisebenzi zasemapulazini kumele okungenani zihole u-r18 ngehora, ezasezindlini zihole u-r15 ngehora bese kuthi eze-extended Public Works Programme (EPWP) zithole u-r11.
Ekhuluma kwi-international Labour Organisation (ILO) ekuqaleni kwesonto, unkk Oliphant uthe sebekhiphe o- inspector ababalelwa ku-1 300 ukubheka ukuthi iyalandelwa na le miyalelo.
“Sikhuluma nje umnyango usohlelweni lokukhipha amagama alabo abangawulandeli umyalelo kwi- website yomnyango.
"Uhulumeni uzinikezele ekutheni umyalelo wemali okumele iholwe ulandelwe,” usho kanje ekhuluma nabenews24.
Uqhube wathi bayazi ngomkhonyovu omusha wokuxosha izisebenzi ukuze zigcine zingayitholanga le mali, kungalandelwanga nemigudu efanele ukuze kulwiswane nokuswelakala kwemisebenzi, ukungalingani nobubha ezweni, nathi bazokuqeda.
Uthe umthetho wezabasebenzi ilabour Relations Act, ukhona ukuqinisekisa ubudlelwano phakathi kwabaphathi nezisebenzi.
Uphinde waveza ukuthi uhulumeni uzonyusa imali yecommission for Concilliation and Arbitration (CCMA) ukuze ikwazi ukubhekana nomsebenzi emiselwe wona, baphinde batshale imali ukwandisa imisebenzi eyisidingo kakhulu ezweni.