UFIHLWE NGESIZOTHA NANGOMCULO UMSOMI
UPHELEZELWE ngenkonzo enesizotha ebihambisana nomculo, ebiyenzelwe emagcekeni omuzi wakhe kwa-e, emlazi, ngolwesihlanu, umnu Thokoza Msomi (70), obengumholi weqembu lomculo we- gospel, ithe Challengers, nanxa ibhokisi lomngcwabo wakhe belingekho.
Ufihlwe emathuneni asemariannhill Monastery, epinetown, kanti inkonzo yakhe ibiphethwe ngabefundisi bebandla lamaroma akhatholika abashaye ngezimfushane badedela uhlelo ukuba luqhubeke nezinkulumo.
Njengoba ibhokisi ebelinesidumbu sakhe lingabanga bikho enkonzweni, bekubekwe isithombe sakhe esikhulu eceleni komkakhe, unkk Sibongile (umasithole) Msomi.
Imoto ebithwele isidumbu sikamufi ifike yama ngaphandle kwesango lomuzi wakhe, abebeyishayela bedlubhe izingubo zokuzivikela ekuthelelekeni ngegciwane.
Bebelokhu befafaza isihlanzisi ebhokisini lakhe.
Umfelokazi namalungu omndeni baye kolibona ibhokisi lingaphakathi emotweni yezidumbu.
Abangcwabi beluleke umfelokazi ukuba angahambi kanye nabo emotweni sekuyiwa emathuneni, kodwa asebenzise enye.
Kufundwe amazwi kankk Msomi lapho ebetusa khona umyeni wakhe, embiza ngendoda ebumelile ubudoda bayo kwaze kwaba sekugcineni.
Umakoti wendodana kamufi, unkk Andisiwe Msomi, uthe uyisezala ubebathanda aze abathophe bengomakoti bamadodana akhe.
Unkk Phakamile Mbonambi, oyindodakazi kamufi, uthe bayambonga uyise obakhulise wabahlomisa ngazo zonke izikhali zempilo, kubalwa kuzo imfundo nokuziphatha kanye nokuzimela.
Inhlanganisela yamaqembu abephethwe ngumnu Msomi aduduze ngolozolo lomculo wokholo.