Idowns ijabulise umgadli ongaconsi phansi

UJABULISE okwengane iphiwa amaswidi umdlali weMamelodi Sundowns egixatshezwa ngenkontileka ende.

Idowns izobhekana nebidvest Wits kwi- semi final yeNedbank Cup ngomgqibelo ngo-19h00 e-orlando Stadium, esoweto.

Idowns izovula imidlalo yakuleli ngalo mdlalo nje, imemezele ukuthi usibusiso “Villa” Vilakazi ongumgadli usesayine inkontileka yeminyaka emine nale kilabhu.

Uvilakazi ujoyine idowns ngo-2016 esuka kuyona iwits abazobhekana nayo. Selokhu efike kwidowns isikimu ngesakhe kanti futhi uyishayela namagoli amqoka.

Lo mdlali uthi uyaphuphuma yinjabulo yokuzwa ukuthi usazohlala iminyaka kuleli qembu eliholwa yimpunyela upatrice Motsepe.

“Ngijabule ngendlela eyisimanga futhi ngizizwa ngithobekile njengoba ngiphinde nganikwa elinye ithuba lokudlalela le kilabhu.

“Ngithanda ukubonga umengameli wekilabhu upatrice Motsepe nebhodi yekilabhu ngokungethemba.

“Ngibonga nomqeqeshi wekilabhu upitso Mosimane, yithimba lakhe kanye nozakwethu engidlala nabo engikholwa wukuthi babe nesandla ekutheni ngiphinde nginikwe leli thuba lokudlalela le kilabhu.

“Ngizimisele ngokuqhubeka nokuyisiza inqobe izicoco,’’ kusho uvilakazi.

Uvilakazi thembisa ukuyisiza le kilabhu inqobe izicoco nje, isasethubeni lokudla ezimbili okuyisicoco seligi ye-absa Premiership kanye nasenedbank.

Nokho lo mdlalo wangoMgqibelo ubhekwe ngabomvu ngabathandi bebhola kwazise ikilabhu ezonqoba iyona engase ikhale yemuke nalesi sicoco.

Nokho kuzobe kubhekwe ngabomvu ukuthi azodlala kanjani la makilabhu njengoba sekuphele izinyanga ezine egcine ukudlala njengoba ibhola belimisiwe ngenxa yokugadla kwecovid-19.

Komunye umdlalo we- semi final yenedbank

Cup, ibaroka izodudulana nebloemfontein Celtic ngomgqibelo ngo14h00 e-orlando Stadium.